ကလေးတစ်ယောက်ကို ပြုစုပျိုးထောင်ဖို့ အရေးကြီးတဲ့အရာကဘာဖြစ်မလဲ။
“သားသမီးမကောင်းမိဘခေါင်းတဲ့၊ မိဘမကောင်းတဲ့အခါ သားသမီးဘဝပျက်တာပဲ” ဆိုပြီး ဆရာတော်ကြီးတစ်ပါးမိန့်တာ မှတ်သားခဲ့ဖူးပါတယ်။ ဆရာတော်ကြီးနာမည်ကတော့မမှတ်မိတော့ပါဘူး။ ဒါပေမယ့် ထိုစကားလေးကတော့ ခုထိစိတ်ထဲမှာ စွဲကျန်နေခဲ့ပါတယ်။ ထိုစကားလေးက သေချာစဉ်းစားကြည့်ရင် သွေးထွက်အောင်မှန်ပါတယ်။ သားသမီးမကောင်းတဲ့အခါ ဘာလို့မိဘရဲ့ခေါင်းပေါ်ကို အပြစ်ပုံကျလာသလဲ၊ သားသမီးဆိုတာ မိဘရဲ့ထိန်းကျောင်းပြုပြင်မှုနဲ့အရွယ်ရောက်ကြီးပြင်းလာရတာမဟုတ်ပါလား။ အဲဒီ့တော့ သားသမီးတစ်ယောက် လိမ္မာခြင်း၊ ဆိုးခြင်း၊ ယဉ်ကျေးခြင်း၊ ရိုင်းစိုင်းခြင်းဆိုတဲ့အကျင့်တွေဟာ မိဘက ပြုပြင်ထိန်းကျောင်းမှုပေါ်မူတည်နေတဲ့အတွက်ကြောင့်ပါ။ အဲဒါကြောင့် သားသမီးမလိမ္မာတဲ့အခါ မိဘအထိန်းကျောင်းမတတ်လို့ဆိုပြီး မိဘအပေါ်သာ အပြစ်သက်ရောက်တာပါ။
ဘာကြောင့်ကလေးတွေကို အပြင်မှာများများကစားခိုင်းသင့်သလဲ။
အက်မင်တို့ ငယ်ငယ်ကတုန်းကဆိုရင် အပင်ပေါ်တက်အသီးခူးတာမျိုး၊ ကွင်းပြင်ကျယ်ကြီးတွေထဲမှာ စိန်ပြေးလိုက်တမ်းဆော့တာမျိုး ကြိုးခုန်တာမျိုး စတဲ့ကိုယ်လက်လှုပ်ရှားကစားနည်းတွေနဲ့ ဆော့ရပေမယ့် ခုခေတ်ကလေးတွေမှာ ထိုကဲ့သို့ ခုန်ပေါက်ပြေးလွှားဆော့ကစားဖို့ ကွင်းပြင်တွေ၊ သစ်ပင်တွေ၊ မြေနေရာလွတ်တွေ တော်တော်ရှားပါးလာပါပြီ။ အဲဒါအပြင် ခေတ်စနစ်အရ ကလေးတစ်ယောက်တည်းနဲ့တောင် သင်တန်း၊ ကျူရှင်၊ ကျောင်း၊ စသည်ဖြင့် ကစားဖို့ရာအချိန်တောင် အလုံအလောက်မရှိတဲ့အခြေအနေမျိုးတွေ ဖြစ်လာပါတယ်။ ကလေးတွေမှာ သဘာဝပတ်ဝန်းကျင်မှာ လေကောင်းလေသန့်ရရှိဖို့ထက် ဖုန်း၊ ကွန်ပျူတာ၊ တီဗွီ စတဲ့ screen time တွေသာ များပြားလာပါတယ်။ ကိုယ်တွေငယ်ငယ်ကဆို အပြင်ထွက် ခုန်ပေါက်ပြေးလွှားဆော့ကစားတဲ့ကလေးမျိုးကသာ ကျန်းမာတာ….ဆိုပြီး လူကြီးတွေက ဆော့ကစားခိုင်းတတ်ပေမယ့် ဒီခေတ်ကလေးတွေမှာတော့ ထိုအခွင့်အရေးတွေ ဆုံးရှုံးနေပါတယ်။ တကယ်က အပြင်ထွက် သဘာဝပတ်ဝန်းကျင်မှာ လေကောင်းလေသန့်ရှုရှိုက်ခြင်း၊ ပြေးလွှားဆော့ကစားခြင်းက ကလေးတွေအတွက် ကောင်းကျိုးတွေအများကြီးရှိပါတယ်။
မိမိရင်သွေးငယ်လေးတွေ ကြီးလာရင် အရပ်ရှည်အောင် ဘယ်လိုလေ့ကျင့်ပေးမလဲ။
မိဘတွေအနေနဲ့ သူတို့ရဲ့ ကလေးငယ်တွေအတွက် ကြီးထွားဖွံ့ဖြိုးမှုရှိအောင်၊ အရိုးအဆစ်တွေသန်မာလာအောင်၊ ကျန်းမာအောင်၊ စိတ်ကျန်းမာအောင်၊ ကိုယ်ကျန်းမာအောင် စသဖြင့် အများကြီး လေ့လာထားရပါမယ်။ အဲဒါမှသာ စိတ်ကော ကိုယ်ပါကျန်းမာပြီး လိမ္မာယဉ်ကျေးတဲ့ကလေးဖြစ်အောင် ပြုစုပျိုးထောင်နိုင်မှာပါ။ ဒီတစ်ခါမှာတော့ ကိုယ့်ရဲ့ရင်သွေးငယ်လေးတွေကို အရပ်ရှည်ပြီး ကျန်းမာအောင် ဘယ်လိုကျွေးမွေးပြုစုရမလဲ ၊ ဘယ်လို လေ့ကျင့်ပေးရမလဲ ဆိုတာလေးတွေကိုဖော်ပြပေးချင်ပါတယ်။ ကလေးတွေကို အရပ်ရှည်အောင် ပြုလုပ်ပေးဖို့ လေ့ကျင့်ပေးနိုင်တဲ့နည်းလမ်းတွေကတော့ အများကြီးရှိပါတယ်။ အဲဒီ့ထဲကမှ အကောင်းဆုံးနဲ့ အလွယ်ကူဆုံးဖြစ်နိုင်မယ့် နည်းလမ်းတွေကိုဖော်ပြပေးပါမယ်။
ကလေးများငယ်ငယ်ထဲက မဖြစ်မနေသင်ယူသင့်ကော အကျင့်ကောင်းလေးများ။
အခုခေတ်ကြီးထဲမှာ မေမေတို့ဖေဖေတို့တတွေ ကလေးငယ်ငယ်ထဲက အင်္ဂလိပ်စာ သင်တန်းတွေထားမယ်။ ကျောင်းစာတွေ စောသင်ခိုင်းထားမယ်။ ဒါမှမဟုတ် အနုပညာနဲ့ ပါတ်သက်တဲ့ တူရိယာတွေ တီးမှုတ် အသုံးပြုတတ်အောင် သင်တန်းတွေ ပို့ထားကြပါတယ်။ သားသားမီးမီးတို့ ရှေ့ ရေးကောင်းဖို့အတွက် ကောင်းမယ်ထင်တဲ့ သင်တန်းတွေကို ငွေ၊အချိန်၊လူအင်အားများစွာ ကုန်ကြခံပြီးတော့ကို ထားနေကြတာ တွေ့ရပါတယ်။ ဘဝမှာ ကိုယ့်သားသမီးလေးတွေ သူတစ်ပါးထက် နှာတစ်ဖျားသာအောင် လိုချင်တဲ့ရည်မှန်းချက်တွင် အလွယ်တကူ ရောက်ရှိနိုင်အောင် အကူအညီပေးမည့် ဘာသာရပ်တွေ အတတ်ပညာတွေကို ကလေးတွေ ငယ်ငယ်ထဲကနေ သင်ယူနိုင်ဖို့ ကြိုးစားနေကြတဲ့ မိဘတွေရဲ့ စေတနာက တကယ့်ကိုအံ့မခန်းပါပဲဗျာ။ ထိုကဲ့သို့ သင်တန်းများကိုထားတာကလည်း ထားရမှာပဲဖြစ်သလို လူတစ်ယောက်ဖြစ်လာရင် လူတစ်ယောက်တွင် ရှိသင့်ရှိထိုက်တဲ့ အခြားသော စိတ်ဓါတ်ပိုင်းဆိုင်ရာ အရည်အသွေးတွေကို တိုးတက်လာအောင် လုပ်ပေးဖို့လည်း လွန်စွာမှ အရေးကြီးတယ်လို့ ထင်ပါတယ်။ အချို့ ကပညာတွေ အရမ်းတော်ပါတယ် ဒါပေမယ့် ရဲရင့်တဲ့ဆုံးဖြတ်ချက်ချနိုင်တဲ့ အရည်အချင်းမရှိလ ျှင်တော့ ဘဝမှာခေါင်းဆောင်ကောင်းတစ်ယောက် ဖြစ်လာနိုင်မှာ မဟုတ်ပါဘူး။ ထိုနည်းတူ ပညာတွေတတ် အရည်အချင်းတွေရှိပြီး အခြားသူတွေနဲ့အတူ အင်တိုက်အားတိုက် အလုပ်ပြီးမြောက်အောင် လက်တွဲပြီး မလုပ်နိုင်ဘူးဆိုရင်လည်း ဘဝမှာ လုပ်ငန်းကြီးတွေ လုပ်ဆောင်ဖို့ မဖြစ်နိုင်ပါဘူး။ ထို့ကြောင့်ပုံတွင်ဖော်ပြထားတဲ့အတိုင်း ဘဝမှာ အရေးကြီးတဲ့ ၁) လိုက်လျောညီထွေနေတတ်သော အကျင့် ၂) ဆက်ဆံရေးပြေပြစ်ကောင်းမွန်စွာ ပြောဆိုတတ်သော အကျင့် ၃) အဖွဲ့အစည်းဖြင့်လုပ်ဆောင်တတ်သော အကျင့် ၄) ပြသာနာကို လ ျှင်မြန်စွာ ဖြေရှင်းနိုင်ခြင်း ၅) ကိုယ့်ကိုယ်ကို စီမံခံခွဲနိုင်ခြင်း ၆) စူးစမ်းမေးမြန်းတတ်သော အကျင့် ၇) ကိုယ်ချင်းစာတတ်သော အကျင့် ၈) ဖန်တီးခြင်း နှင့် ဆန်းသစ်တီထွင်တတ်ခြင်း အစရှိသော အကျင့်ကောင်းများကို ဖေဖေတို့မေမေတို့အနေနဲ့ သားသားမီးမီးလေးတွေ သင်ယူလေ့လာနိုင်တဲ့ ပတ်ဝန်းကျင်မှာ ကြီးပြင်းလာအောင်လည်း ဖန်တီးပေးရမှာ ပဲဖြစ်ပါတယ်။ ကိုယ်ကိုယ်တိုင်က ဒီလိုအကြောင်းအရာတွေနဲ့ ပါတ်သက်ပြီး အားနည်းတယ်လို့ ခံစားရတယ်ဆိုရင်လည်း ထိုကဲ့သို့ ဘဝအတွက် တန်ဖိုးရှိတဲ့ အရည်အသွေး(Value) တွေကို နားလည်အောင် သင်ကြားပို့ချပေးနေတဲ့ သင်တန်းကောင်းတွေ ရွေးချယ်တတ်ဖို့လိုပါလိမ့်မယ်။ မြင့်မြတ်သော စိတ်ထားရှိတဲ့ လူတော်လူကောင်းလေးတွေရဲ့ မေမေဖေဖေတွေ ဖြစ်လာပါစေလို့ ဆုမွန်ကောင်းတောင်းပေးလိုက်ရပါတယ်။ #BAWA101
ကလေးပြုစုပျိုးထောင်ခြင်း ပျော်ရွှင်သောဘဝ လူနေမှုဘဝ စိတ်ဓာတ်ခွန်အား
မွေးကင်းစကလေးအရွယ်အိမ်မှာရှိလျှင် သတိထားရမည့်အချက်များ
မွေးကင်းစကလေးအရွယ်ဆိုတာ အရမ်းကိုအထိခိုက်မခံတဲ့အရွယ်ပါ။ တကယ်လို့များ သင့်အိမ်မှာ ခုမှဆေးရုံကဆင်းလာတဲ့ ကလေးမေမေနဲ့မွေးကင်းစကလေးငယ်ရှိနေခဲ့တယ်ဆိုရင် သင်ဂရုစိုက်သင့်တဲ့၊ သတိထားသင့်တဲ့အချက်တွေ ရှိပါတယ်။ အရမ်းလည်း အရေးကြီးတာမို့ အလေးထားသတိထားသင့်ပါတယ်။#BAWA101
ကျောင်းမှာမိမိကလေး အနိုင်ကျင့်ခံနေရရင် ဘယ်လိုကိုင်တွယ်မလဲ။
၁) စိတ်အေးအေးထားပြီး ကလေးကို မေးမြန်းပါ။ အရင်ဆုံး သင့်စိတ်ကိုတည်ငြိမ်အောင်လုပ်ဖို့လိုပါတယ်။ သင့်ကလေးထိခိုက်နာကျင်လာတာကို သင်က အရမ်းတွေပေါက်ကွဲပြနေရင် ခံနေရတဲ့သင့်ကလေးက ပိုပြီး ကြောက်လန့်စိတ်တွေဖြစ်လာနိုင်ပါတယ်။ သင့်စိတ်တည်ငြိမ်ပြီဆိုရင်တော့ ကလေးကို အေးဆေးစွာမေးမြန်းပါ။ သတိထားရမှာက ကလေးကို မေးမြန်းတဲ့အခါ လုံးဝဒေါသသံမပါပါစေနဲ့။ ကလေးကအနိုင်ကျင့်ခံလာရတဲ့အတွက် အနိုင်ကျင့်သူကိုလည်း ကြောက်လန့်နိုင်နေသလို သင့်ကိုလည်း ကြောက်လန့်နေနိုင်ပါတယ်။ အဲဒါကြောင့် သင်မေးတဲ့အခါ ကြင်နာစွာ သူငယ်ချင်းပုံစံမျိုးမေးတာအကောင်းဆုံးပါ။ အဲဒါမှ ကလေးက သင့်ကို တစ်လုံးမကျန်အမှန်အတိုင်းပြောရဲမှာပါ။ “သား….ဘာဖြစ်လာတာလဲ၊ ဒီလိုဖြစ်လာအောင် ဘယ်သူလုပ်လိုက်လဲ။ ဒါမှမဟုတ် အတူကစားကြရင်းဖြစ်တာလား။ အတူကစားရင်းဖြစ်လာလည်း မေမေ့ကိုပြောပြနော်။ မေမေမဆူဘူး၊ မေမေစောစောသိတော့ သားကို ထိခိုက်ဒဏ်ရာရရင် မေမေစောစောဆေးထည့်ပေးနိုင်တာပေါ့။” ဆိုတာမျိုး သူ့ကိုမဆူကြောင်း၊ ပွင့်ပွင့်လင်းလင်းပြောပြဖို့လိုကြောင်း ပြောပြီးမှ သိချင်တာ နည်းနည်းချင်းဆက်မေးပါ။ “သား….ဒဏ်ရာက အန္တရာယ်ရှိတဲ့ဒဏ်ရာမျိုးဆို မေမေတို့မသိတော့ ဘယ်သူထိခိုက်မှာလဲသား…..။ သားပဲအရင်ဆုံးခံရမှာနော်။ တစ်ခုခုဖြစ်ရင် မေမေ့ကို ရှင်းပြရင် မေမေနားထောင်မယ်နော်။” ဆိုတာမျိုး ညင်သာစွာမေးခြင်းက ကလေးကသူ့ကိုမဆူမပူဘူးဆိုတာသေချာသွားရင် အကြောက်စိတ်ပြယ်ပြီး ဖြေးဖြေးချင်းပြောပြလာမှာပါ။ ၂) ကြောက်စိတ်မဝင်ရန် အားပေးပါ။ ကျောင်းပို့မယ့်အချိန် ကျောင်းမှာဖြစ်တတ်တာကို ကြိုပြီး နားလည်အောင် ရှင်းပြပေးထားတာ ပိုကောင်းပါတယ်။ အဲဒါက ကျောင်းမှာ လူပေါင်းစုံနဲ့ပေါင်းသင်းရတဲ့အခါ သင့်ကလေးကို ဘယ်လိုဖြေရှင်းမလဲဆိုတဲ့အတွေးကို တွေးတတ်စေမှာပါ။ ကျောင်းမှာ လူပေါင်းစုံရှိနိုင်ကြောင်း၊ လူကောင်း၊လူဆိုး၊ လူမိုက်၊ လူလိမ္မာ စသည်ဖြင့် ကြိုမသိနိုင်ကြောင်း။ အကယ် ၍များ အနိုင်ကျင့်တတ်သူမျိုးပါလာခဲ့လျှင်…..လုံးဝကြောက်ဖို့မလိုကြောင်း၊ အနိုင်ကျင့်သူကသာ ကြောက်ရမယ်ဖြစ်ကြောင်း။ အနိုင်ကျင့်ခြင်းက လုံးဝမကောင်းသောအပြုအမူဖြစ်ကြောင်း၊ အနိုင်ကျင့်တတ်သူမှန်းသိလျှင် အပေါင်းအသင်းမလုပ်သင့်ကြောင်း မှာထားသင့်ပါတယ်။ သင့်ကလေးကရှောင်နေရဲ့သားနဲ့ ကြုံလာခဲ့လျှင်လည်း လုံးဝမကြောက်ဘဲ သက်ဆိုင်ရာဆရာမကို သက်သေပြပြီး တိုင်နိုင်ကြောင်း သင်ပေးထားပါ။ ဥပမာ ။ သင့်ကလေးစာအုပ်ကို ခြစ်ပစ်လိုက်တယ်ဆိုလျှင် ခြစ်ပစ်ထားသောစာအုပ်ကို ပြလျက် ဆရာမကို ချက်ချင်းတိုင်ကြားရန် သင်ပေးထားတာမျိုးပါ။ အနိုင်ကျင့်ခံရပြီးပြီးချင်း တိုင်ရန်က အရေးကြီးကြောင်းသေချာ ပြောပြထားပါ။ ချက်ချင်းအနိုင်ကျင့်ပြီး ချက်ချင်းအတိုင်ခံရမှန်း (ချက်ချင်းအပြစ်ပေးခံရမှန်း) သိလျှင် နောင်ဆို အနိုင်ကျင့်မည့်ကလေးမှာ လုပ်ရဲတော့မည်မဟုတ်ပါ။ ကိုယ်ထိလက်ရောက် အနိုင်ကျင့်ခံခဲ့ရလျှင်လည်း လုံးဝကြောက်စရာမလိုဘဲ ဒဏ်ရာကိုပြကာ ချက်ချင်းဆရာမကို တိုင်ရမည်ဖြစ်ကြောင်း သင်ပေးထားပါ။ ကြောက်လန့်ပြီး တိတ်တိတ်လေး နေလိုက်ခြင်းက အနိုင်ကျင့်မည့်ကလေးကို ပိုပြီး အနိုင်ကျင့်လာအောင် တိုက်တွန်းနေသလိုဖြစ်နေကြောင်းလည်း ပြောပြပါ။ တကယ်တမ်း အနိုင်ကျင့်ထားသူကလေးကသာ ကြောက်လန့်နေရမှာဖြစ်ကြောင်း နားလည်အောင်ပြောပြပါ။ ဆရာမက ကူညီပေးမယ့်အကြောင်း၊ မိဘများက ကလေးဘက်မှာ အမြဲရှိကြောင်းပြောပြထားပါ။ ကလေးဖြစ်ပျက်ခဲ့သမျှကိုသာ အကုန်လုံးပြန်ပြောခဲ့လျှင် မိဘများကပါ ဝိုင်းကူဖြေရှင်းပေးနိုင်ကြောင်း ကလေးကိုသိနေအောင် ပြောပြထားပါ။ နောက်ထပ်အရေးကြီးတာတစ်ချက်က အနိုင်ကျင့်ခံရတာ ကောင်းလား….မကောင်းလား သင့်ကလေးကို မေးပါ။ မကောင်းဘူး….ဆိုလျှင် “သားမကြိုက်တဲ့အလုပ်ကို သူများကိုလုပ်တာကော သူများကြိုက်ပါ့မလား….” ဆိုတာကို မေးရင်း ဆုံးမပေးပါ။ ကိုယ်မကြိုက်တဲ့အပြုအမူမျိုးကို သူတစ်ပါးကိုလည်း သင်ပေးထားဖို့လိုပါတယ်။ အဲဒါမှ နောင်အနာဂတ်မှာ အနိုင်ကျင့်တတ်တဲ့ကလေးမျိုးတွေ နည်းပါးလာမှာပါ။ ၃) ပြန်တုံ့ပြန်ရန်မလိုကြောင်း၊ လျစ်လျူရှုသင့်ကြောင်း သင်ပေးထားပါ။ ထိုကဲ့သို့ အနိုင်ကျင့်တတ်သော ကလေးမျိုးကို မပေါင်းသင့်ကြောင်း သင့်ကလေးကို ပြောပြပါ။ လာပတ်သက်လျှင်လည်း ကြောက်စရာလုံးဝမလိုကြောင်း ပြောပြထားပါ။ ကိုယ့်ဘက်ကသာ သူလုပ်ခဲ့သလို ပြန်လုပ်ဖို့ တုံ့ပြန်ရန်မလိုကြောင်း သင်ပေးပါ။ အနိုင်ကျင့်တတ်သောအကျင့်သည် မကောင်းသောအကျင့်ဖြစ်သောကြောင့် သင့်ကလေးကပြန်လုပ်ရန်မသင့်ကြောင်းရှင်းပြပါ။ လူမိုက်နဲ့ပြိုင်ပြီး လူမိုက်မဖြစ်ရန်လိုကြောင်း နားလည်အောင်ရှင်းပြပါ။ အကောင်းဆုံးနည်းလမ်းက တစ်ခန်းတည်းအတူကျောင်းတက်ပေမယ့် လျစ်လျူရှုထားခြင်းသာ အကောင်းဆုံးဖြစ်ကြောင်း ပြောပြထားပါ။ ပတ်သက်လာလျှင်လည်း ကြောက်ဖို့မလိုကြောင်း၊ ရန်ဖက်ဖြစ်ရန်လည်းမလိုကြောင်း၊ နောက်ဆုံး မပေါင်းသင့်လို့ လျစ်လျူရှုထားခြင်းသာဖြစ်ကြောင်း နားလည်အောင်ပြောပြထားပါ။ အထူးသတိထားရမှာက ထိုအနိုင်ကျင့်တတ်သောကလေးကို ပြန်ပြီး တုံ့ပြန်ရန် မသင်ပေးဖို့ ဖြစ်ပါတယ်။ “ ပြန်ချလိုက်ပေါ့……ပြန်ထိုးလိုက်ပေါ့……” လို့ သင်ပေးလိုက်ခြင်းက သင့်ကလေးကို အနိုင်ကျင့်တတ်သူဖြစ်သွားစေတတ်ပါတယ်။ အခြားတစ်ယောက်ယောက်ကို ကိုယ်ထိလက်ရောက်ကျူးလွန်ဖို့ လွယ်ကူသွားစေနိုင်တယ်ဆိုတာ သတိထားပါ။ ၄) သင့်ကလေးရဲ့ ခန္ဓာကိုယ်ခြေလက်တွေ၊ သူ့ရဲ့ မျက်နှာအမူအယာ၊ စိတ်ပိုင်းဆိုင်ရာ၊ ကျောင်းသုံးပစ္စည်းတွေ စသည်တို့ကို အမြဲစစ်ဆေးပေးပါ။ တစ်ခါတစ်လေကျရင် သင့်ကလေးကို အနိုင်ကျင့်တတ်သူကလေးက ခြိမ်းခြောက်ထားတာပဲဖြစ်ဖြစ်၊ သင့်ကလေးကိုယ်တိုင်ကိုက ကြောက်လို့ပဲဖြစ်ဖြစ် သင့်ကို ဖုံးကွယ်ထားနိုင်ပါတယ်။ သင့်ကလေးရဲ့ စိတ်အခြေအနေကို သိဖို့ကတော့ သူ့ရဲ့ တစ်နေ့တာမှာ တက်ကြွမှုရှိမရှိ၊ အားငယ်နေဟန်ရှိမရှိ၊ ကျောင်းသွားရမှာကို ကြောက်လန့်မှုရှိမရှိ သတိထားကြည့်ခြင်းဖြင့် သိနိင်ပါတယ်။ သူ့ရဲ့ ကျောင်းပစ္စည်းများကို စစ်ဆေးပြီး ခြေရာလက်ရာပျက်နေတာမျိုး တွေ့ရင်လည်း မေးပါ။ သင့်ကလေးရဲ့ မျက်နှာ၊ ခြေလက်၊ ကိုယ်ခန္ဓာမှာ ဒဏ်ရာအနာတရဖြစ်လာတာမျိုးတွေ့ရင်လည်း မေးပါ။ တစ်ခုရှိတာက မေးတဲ့အခါ သင့်ကလေးကို အပြစ်ရှာသလို စစ်ဆေးမေးမြန်းတာမျိုးမဟုတ်ဘဲ စိတ်ပူလို့ ကြင်နာစွာမေးတဲ့ပုံစံမျိုးဖြစ်ပါစေ။ ၅) သင့်ကလေးကျောင်းကပြန်လာလျှင် နွေးနွေးထွေးထွေးဆက်ဆံပေးပါ။ သင့်ကလေးက ကျောင်းမှာ အနိုင်ကျင်ခံလာရတဲ့အခါ ကျောင်းကအပြန် အိမ်ကို အားကိုးတကြီးရင်ဖွင့်ချင်နေမှာ သေချာပါတယ်။ သင့်ကလေးကျောင်းကအပြန်မှာ နွေးထွေးစွာဆက်ဆံလိုက်ခြင်းက သင့်ကလေးကို ရင်ဖွင့်ချင်လာအောင် အနုနည်းနဲ့တိုက်တွန်းနည်းတစ်မျိုးပါပဲ။ တစ်နေ့တာလုံး ဘာတွေလုပ်ခဲ့ကြောင်း မေးတာမျိုး၊ ဘာတွေထူးခြားတာဖြစ်ပျက်သေးလဲ မေးတာမျိုးက သင့်ကလေးက အရေးအကြောင်းတစ်ခုခုဆို သင့်ကိုသာ ပြောပြချင်အောင် အကျင့်လုပ်ပေးနည်းတစ်မျိုးပါ။ အဲဒါက သင့်ကလေးကို စိတ်ဖိစီးမှုတွေကနေ လွတ်မြောက်စေနိုင်ပါတယ်။ ၆) သက်ဆိုင်ရာ ဆရာမနဲ့ တွေ့ဆုံပါ။ ဆရာမနဲ့တွေ့ဆုံပြီး အခြေအနေကို ပြောပြဆွေးနွေးပါ။ ချက်ချင်းတိုင်ကြားဖို့ သင့်ကလေးကို မှာကြားထားကြောင်း၊ ထိုအခြေအနေမျိုး ကြုံလာရင် ချက်ချင်းအရေးယူပေးဖို့ အကူအညီပေးပါ ဟုပြောပါ။ အနိုင်ကျင့်ခံရတာများလာလျှင် စိတ်ပိုင်းဆိုင်ရာထိခိုက်နိုင်ကြောင်း ပြောပြပါ။ ကလေးရဲ့ တက်ကြွမှုတွေ ပျောက်ဆုံးကုန်ကြောင်း ပြောပြအကူအညီတောင်းပါ။ ၇) အခြေအနေဆိုးဝါးလာရင် အတန်း(သို့) ကျောင်းပြောင်းပါ။ ဒီနည်းလမ်းကတော့ အမြဲမမှန်နိုင်ပါဘူး။ ဘာလို့လဲဆိုတော့ အခြားသောနေရာပတ်ဝန်းကျင်မှာလည်း အနိုင်ကျင့်တတ်သူဆိုတာမျိုး ထပ်ကြုံလာနိုင်လို့ပါပဲ။ ဒီပြဿနာကို ဘယ်လိုဖြေရှင်းမလဲ၊ နောက်ပိုင်းကြုံလာခဲ့သေးရင် ဘယ်လိုဖြေရှင်းမလဲဆိုတာကိုသာ သင်ပေးခြင်းက သင့်ကလေးတစ်ဘဝလုံးအတွက် စိတ်ချရနိုင်မှာပါ။ ဒါပေမယ့် လုံးဝကို ရုပ်ပိုင်းဆိုင်ရာအရကော စိတ်ပိုင်းဆိုင်ရာအရကော ကျောင်းတက်ရတာ မသက်မသာဖြစ်နေရပါတယ်ဆိုရင်တော့ ကျောင်းပြောင်းတာမျိုး၊ အတန်းပြောင်းလိုက်တာမျိုးက အကောင်းဆုံးပါပဲ။ အထက်မှာဖော်ပြထားတဲ့အချက်လေးတွေကို လက်တွေ့အသုံးပြုပြီး သင့်ကလေးကို သင်ကြားပေးကြည့်ပါနော်။ မိဘတွေ သတိထားသင့်တာက သင့်ကလေးကို အလွယ်ဆုံးနည်းလမ်းနဲ့ “ပြန်သာချလာခဲ့……” ကျောင်းမှာ သူများအနိုင်ကျင့်တာခံပြီး ပြန်လာရင် ကလေးကိုထပ်ရိုက်မယ်လို့ ပြောတတ်တာမျိုးပါ။ အနိုင်ကျင့်တတ်သော အကျင့်ကို မကောင်းသောအကျင့်တစ်ခုလို သူများကိုလည်း အနိုင်မကျင့်တတ်အောင်သင်ပေးပြီး၊ ပြ ဿနာကိုဖြေရှင်းတတ်အောင် သင်ပေးခြင်းကသာ နောင်အနာဂတ်မှာ နောက်ထပ်နောက်ထပ် အနိုင်ကျင့်တတ်သော ကလေးတွေ ထပ်မပေါ်လာနိုင်မှာပဲဖြစ်ပြီး အနိုင်ကျင့်တတ်သော ကလေးတွေထပ်မပေါ်လာခြင်းကလည်း အနိုင်ကျင့်ခံရသော ကလေးတွေလည်း ထပ်မဖြစ်လာနိုင်တော့ပါဘူး။ အားလုံးပဲ အနိုင်ကျင့်ခံရခြင်းမှ ကင်းလွတ်ပါစေ။#BAWA101
ကွာရှင်းပြီးရင် ကိုယ့်သားသမီးလေးတွေကို ဘယ်လိုပြုစုပျိုးထောင်မလဲ။
အချိန်တစ်ခုအထိ လက်တွဲလာခဲ့တဲ့အိမ်ထောင်ရေးမှာ သံယောဇဉ်အနည်းအများတော့ရှိကြမှာပါပဲ။ လုံးဝညှိုနှိုင်းမရတော့လို့ ကွာရှင်းကြတဲ့အခါ လူကြီးတွေထက် ပိုပြီး ခံစားရမှာ ကလေးတွေပါ။ လူကြီးတွေကတော့ အကြောင်းအမျိုးမျိုးနဲ့ ဖြေသိမ့်နိုင်သလို ကိုယ့်ကိုကိုယ်ဆောက်တည်နိုင်ပေမယ့် ကလေးတွေကတော့ ရုတ်တရက်ကြီး အဖေ၊အမေနဲ့အတူနေထိုင်တဲ့အိမ်မှာ အဖေဒါမှမဟုတ် အမေမရှိတော့တာမျိုးက သူတို့အတွက် နာကျင်မှုအကြီးကြီးဖြစ်စေပါတယ်။ အဲဒီလိုအခြေအနေမျိုးကြုံလာရတဲ့အခါ ကိုယ့်သားသမီးလေးတွေ ဘယ်လိုပြုစုပျိုးထောင်မလဲဆိုတဲ့အချက်လေးတွေကို ဖော်ပြပေးထားပါတယ်။ ၁) စိတ်ပိုင်းဆိုင်ရာအရ အားငယ်မှုမရှိအောင် အားပေးပါ၊ နှစ်သိမ့်ပေးပါ။ ကလေးတွေရဲ့အပေါင်းအသင်း၊ ပတ်ဝန်းကျင်မှာများ “အဖေနဲ့အမေက ကွာရှင်းပြီးပြီ…” ဆိုတဲ့စကားမျိုးကို သူတို့ သွေးအေးအေးပြောပြနိုင်မယ်ထင်ပါသလား။ လုံးဝပါပဲ။ သူတို့အတွက်က စိတ်ပိုင်းဆိုင်ရာ အကြီးမားဆုံးထိခိုက်မှုက အဖေ ဒါမှမဟုတ် အမေက သူတို့ကို ထားခဲ့ခြင်းပါပဲ။ အဲဒါကို အဓိကနားလည်ဖို့လိုပါတယ်။ အဲဒါကြောင့် သိမ်ငယ်သလိုခံစားနေရမယ့် သူတို့ကို နွေးထွေးစွာဆက်ဆံခြင်း၊ သူတို့ရင်ဖွင့်ချင်လာအောင် ဖက်လှဲတကင်းအလိုက်သတိဆက်ဆံပေးခြင်းတွေက သူတို့အတွက် ခံစားရအနည်းငယ်သက်သာစေမှာပါ။ အဖေနဲ့အမေက စိတ်သဘောထားချင်းမတိုက်ဆိုင်လို့သာ ကွဲကွာရခြင်းဖြစ်ပြီး သားသမီးတွေအတွက်ကတော့ အဖေနဲ့အမေကို အချိန်မရွေး သတိရတိုင်း တွေ့နိုင်ကြောင်း၊ ပြောပြလို့ရကြောင်း အားပေးနှစ်သိမ့်ပေးပါ။ ၂) ရှင်းပြပေးပါ။ လူတိုင်းမှာ ကိုယ့်အမှန်တရားနဲ့ကိုယ်ရှိကြောင်း၊ ကိုယ်တိုင်ညှိုယူနိုင်မယ်ထင်မှသာ အိမ်ထောင်ပြုသင့်ကြောင်း ပြောပြဆွေးနွေးပါ။ ဒါက အရမ်းဆိုးဝါးပြီး ကလေးတွေအတွက် ဒုက္ခိတဖြစ်စေတာမျိုး မဟုတ်ကြောင်း၊ လူတောမတိုးနိုင်တော့သောဖြစ်ရပ်မဟုတ်ကြောင်း၊ ဒီထဲကနေမှ အချိန်တန်အရွယ်ရောက်လျှင် အိမ်ထောင်ပြုချိန်မှာ ကိုယ်နဲ့အဆင်ပြေမယ်၊ အပြန်အလှန်နားလည်ပေးနိုင်မယ့်သူမျိုးကိုသာ ရွေးချယ်သင့်ကြောင်းဆိုတဲ့ သင်ခန်းစာတောင်ရနိုင်သေးကြောင်းပြောပြပေးပါ။ ကိုယ့်အတွက် လုံးဝအဆင်မပြေသောအခြေအနေမျိုးမို့သာ လမ်းခွဲရခြင်းဖြစ်ပြီး ကလေးများကိုထိခိုက်စေလိုသော ရည်ရွယ်ချက်မရှိကြောင်း သေချာလေးရှင်းပြပေးပါ။ ၃) အရင်ကထက် ပိုပြီးအချိန်ပေးပါ။ သူတို့အတွက် အိမ်ဆိုတာ အမြဲခြောက်ကပ်ပြီး ကြောက်လန့်စရာနေရာမျိုးဖြစ်မနေပါစေနဲ့။ သူတို့ကိုအရင်ကထက် အချိန်ပိုပေးပါ။ သူတို့နဲ့အတူ ဈေးဝယ်ထွက်တာမျိုး၊ သူတို့နဲ့အတူဆော့ကစားတာမျိုး၊ ပန်းခြံကစားကွင်းသွားတာမျိုးလုပ်ပြီး အရင်ကထက်ပိုပြီးပျော်စရာကောင်းတဲ့အခြေအနေမျိုးဖန်တီးပေးပါ။ အဲဒါမှ သူတို့ဝေဒနာအနည်းငယ်သက်သာသလို အိမ်ကိုလည်း ကြောက်စရာနေရာလို့သဘောမထားဘဲနေမှာပါ။ အဲဒါမှ တခြားလမ်းမှားပေါ်မရောက်သွားစေတော့ပါဘူး။ ၄) သူတို့ရဲ့နေ့စဉ်ဘဝကို ကိုယ်သိပါစေ။ ကျောင်းချိန်ပြန်တာဘယ်အချိန်၊ ကျူရှင်ဘယ်အချိန်ရှိမရှိ၊ သားသမီးသွားတတ်သော ပေါင်းတတ်သောသူငယ်ချင်းက ဘယ်သူ စသည်ဖြင့် အကြမ်းဖျင်းသိထားတာက သင့်သားသမီးရဲ့ အခြေအနေမှန်ကို သင်မှန်းဆနိုင်ပါတယ်။ သူတို့လေးတွေရဲ့စိတ်ပိုင်းဆိုင်ရာအခြေအနေက ဘယ်လိုရှိမှန်းသင်အတိအကျမသိနိုင်တဲ့အတွက် သူတို့တွေ အိမ်အပြင်မှာ ဘာတွေဖြစ်နိုင်လဲ၊ ဘာတွေလုပ်နိုင်လဲဆိုတာ သင်အတိအကျမသိနိုင်ပါဘူး။ အဲဒါကြောင့် သူတို့လေးတွေရဲ့အခြေအနေအကြမ်းဖျင်းသိအောင် လေ့လာထားသင့်ပါတယ်။ အခုလိုအချိန်မှာ သူတို့စိတ်ထိခိုက်ပြီး စိတ်ထင်ရာလုပ်မိတာမျိုး မဖြစ်ရအောင်ပါ။ ၅) စာဖတ်ဖို့ တိုက်တွန်းပါ။ စိတ်နှလုံးတက်ကြွစေမယ့် ၊ ခွန်အားဖြစ်စေမယ့် စာမျိုးတွေကို ဖတ်ခိုင်းသင့်ပါတယ်။ စာဖတ်ချိန်မှာ စာအုပ်ထဲက အကြောင်းအရာကိုသာ အာရုံစိုက်နေမိတဲ့အတွက် အခြားစိတ်ဖိစီးမှုတွေကို ပြန်တွေးဖို့ အချိန်မရတော့ပါဘူး။ စိတ်လည်းတည်ငြိမ်စေပါတယ်။ ပြီးတော့ စိတ်ဓာတ်လည်း ပြန်လည်တက်ကြွစေနိုင်ပါတယ်။ အထူးသဖြင့် မိဘမဲ့ဘဝကနေ မိဘအကူအညီမပါဘဲ အောင်မြင်သွားတဲ့ကလေးမျိုးအကြောင်းတွေ၊ မိဘတွေ အိမ်ထောင်ကွဲခဲ့ရာကနေ ဘဝကိုကြိုးစားတဲ့ကလေးမျိုးတွေ၊ မသန်စွမ်းတဲ့ကလေးမျိုးတွေက ဘဝမှာအောင်မြင်လာတာမျိုးတွေပေါ့။ ပြီးတော့ ဘဝမှာ ဘယ်လောက်ပဲအဆိုးတွေကြုံရပါစေ အကောင်းမြင်တတ်အောင် ကြိုးစားခဲ့တဲ့ကလေးမျိုးတွေ စသည်ဖြင့်ပေါ့။ ကိုယ်က နှုတ်နဲ့ပဲ စာဖတ်ကြည့်ပါလားလို့ တိုက်တွန်းတာထက် ဘယ်စာအုပ်လေးအကြောင်း ပြောပြချင်လို့ သေချာနားထောင်ပေးရင် လိုချင်တာတစ်ခုခုပေးမယ်ဆိုတာမျိုးနဲ့ ဆွဲဆောင်ကြည့်ပါ။ စာလုံးဝဖတ်စမရှိသေးတဲ့ကလေးမျိုးဆိုရင်တော့ ကိုယ်က အဓိကပေးချင်တဲ့ မက်ဆေ့ကို ထုတ်နုတ်ပြောပြပေးပါ။ စာဖတ်ကျင့်ရှိနေတဲ့ကလေးတစ်ယောက်ဆိုရင်တော့ ပြောပြတဲ့ဇာတ်ကြောင်းထဲက ပေးချင်တဲ့မက်ဆေ့က ဘာလဲ….ဆိုတာမျိုး သူတို့ကို စဉ်းစားခိုင်းပါ။ အဲဒါဆို သူတို့မှာ စိတ်ပျံ့လွင့်ဖို့ အချိန်မရှိတော့ပါဘူး။ ၆) သူတို့အပြစ်မဟုတ်ကြောင်း သိပါစေ။ မိဘများစိတ်သဘောထားမတိုက်ဆိုင်ဘဲ ကွဲကွာခြင်းက ကလေးတွေအပြစ်မဟုတ်သလို ကလေးတွေရဲ့ဘဝမှာ အောင်မြင်မှုကို ကြိုးစားရယူဖို့ ထိုက်တန်ကြောင်း။ စိတ်ဓာတ်ကျနေတာက ကိုယ့်ကိုကိုယ်သတ်နေတာဖြစ်ကြောင်း စသည်ဖြင့်ရှင်းပြပြောပြပေးပါ။ လူတိုင်းက မိမိစိတ်ကြိုက်ဘဝကို ခြယ်လှယ်ပိုင်ခွင့်ရှိကြောင်း၊ မိဘများကြောင့် ခံစားရတာကို စိတ်မကောင်းကြောင်း၊ သင့်ကလေးရဲ့ဘဝကို ဒီထက်အောင်မြင်အောင်ကြိုးစားနိုင်သေးကြောင်း ပြောပြပါ။ ၇) နာကျင်မှုကို ခွန်အားအဖြစ်ပြောင်းဖို့ သတိပေးပါ။ ကလေးတွေရဲ့တစ်ချို့ပတ်ဝန်းကျင်မှာ “နင့်အဖေက နင်တို့ကို ထားသွားပြီ……” ဆိုတာမျိုး၊ “နင့်အမေကပြန်မလာတော့ဘူးမလား…..” ဆိုတာမျိုးနဲ့ စနောက်သလို၊ လှောင်ပြောင်သလို လုပ်တတ်တဲ့ လူအမျိုးအစားတစ်မျိုးရှိပါတယ်။ အရမ်းကို အဆင့်အတန်းနိမ့်ကျတဲ့သူမျိုးပါ။ ထိုကဲ့သို့များ သင့်ကလေးတွေအပြောခံခဲ့ရသည်ရှိသော် ဝမ်းနည်းစရာလုံးဝမလိုကြောင်း အားပေးပါ။ အချိန်မရွေး မိမိကိုရင်ဖွင့်နိုင်ကြောင်း ပြောပြပါ။ ထိုကဲ့သို့ ပြောဆိုတတ်သူမျိုးက သင့်ကလေးနဲ့အတန်းတူသူဖြစ်ခဲ့ရင် ထိုသူပေးတဲ့နာကျင်မှုကို ခွန်အားအဖြစ်ပြောင်းလဲနိုင်ကြောင်းရှင်းပြပါ။ အတန်းထဲမှာ အတော်ဆုံးဖြစ်အောင်ကြိုးစားတာမျိုး၊ အားကစားမှာအတော်ဆုံးဖြစ်အောင် ကြိုးစားတာမျိုးက သူတို့ကို အံ့အားသင့်စေနိုင်ကြောင်း ပြောပြပါ။ တိုက်တွန်းပါ။ အထက်ပါအချက်များက ကလေးတွေကို ပြုစုပေးဖို့ အကြမ်းဖျင်းအခြေခံခိုင်မာဖို့လိုအပ်တဲ့အချက်လေးတွေပဲဖြစ်ပါတယ်။ ကလေးတစ်ယောက်ချင်းရဲ့ စိတ်ပိုင်းဆိုင်ရာအခြေအနေ၊ အရွယ်အလိုက်သဘာဝပေါ်မူတည်ပြီး သူတို့လေးတွေကို ပြုစုပျိုးထောင်ပုံက အမျိုးမျိုးကွဲပြားနိုင်ပါတယ်။ အခြေခံအချက်လေးတွေ ခိုင်မာနေတဲ့ကလေးဖြစ်လာအောင် ကြိုးစားကြည့်ခြင်းက ရုတ်တရက်မိသားစုပြိုကွဲခြင်းဒဏ်ကိုခံနိုင်ရည်ရှိတဲ့ကလေးတွေမဟုတ်တောင် သူတို့အတွက် အနည်းငယ်ကုစားပေးနိုင်မယ်ထင်ပါတယ်။ အားလုံးပဲပျော်ရွှင်သောမိသားစုဖြစ်နိုင်ကြပါစေ။ #BAWA101
ကလေးငယ်လေးတွေ ထွားကြိုင်းသန်မာလာအောင် ဘယ်လိုလုပ်ပေးရမလဲ
။ ကလေးက ပိန်တယ်၊ ညှက်တယ်၊ မကြာခဏချော်လဲတတ်တယ်။ စသည်ဖြင့် မေမေတွေညည်းကြတာကြားဖူးမှာပါ။ မိမိကလေးကို ထွားကြိုင်းသန်မာအောင် ကျွေးသင့်တဲ့အစားအစာလေးတွေနဲ့ သူတို့ရဲ့အရိုးအဆစ်တွေသန်မာအောင် ဘာလိုကစားနည်းမျိုးတွေနဲ့ ဘာတွေလိုအပ်သလဲဆိုတာ ရေးပေးထားပါတယ်။ ကလေးရဲ့အရိုးတွေ၊ ကြွက်သားတွေ ထွားကြိုင်းသန်မာအောင် စားသင့်တဲ့အစားအစာတွေကတော့ အောက်ပါအတိုင်းဖြစ်ပါတယ်။ ၁) ဘယ်ရီသီးများ စတော်ဘယ်ရီနဲ့ ဘလူးဘယ်ရီသီးတွေက ဗီတာမင် စီ ကြွယ်ဝစွာပါဝင်ပါတယ်။ အောက်ဆီဂျင်ကထုတ်လုပ်တဲ့ဓာတ်ပေါင်းတွေနဲ့ အပင်ကထုတ်တဲ့ဓာတ်ပေါင်းတွေပါဝင်ပါတယ်။ အဲဒါတွေက ကျန်းမာစေတဲ့ဆဲလ်တွေကို ပျက်စီးခြင်းမှ ကာကွယ်ပေးပါတယ်။ ခန္ဓာကိုယ်က ခုခံစွမ်းအားလည်းတိုးစေပါတယ်။ ၂) ဥအမျိုးမျိုး ဥတွေမှာ ပရိုတင်းဓာတ်နဲ့ အာဟာရဓာတ်တွေအမျာကြီးပါဝင်ပါတယ်။ အထူးသဖြင့် ဦးနှောက်ဖွံ့ဖြိုးမှုအတွက်မရှိမဖြစ်လိုအပ်တဲ့ အာဟာရဓာတ်တွေပါဝင်ပါတယ်။ ၃) နွားနို့ နွားနို့မှာ ကယ်လစီယမ်နဲ့ ဖော့စဖောရပ် တို့ပါဝင်တဲ့အတွက် ကြွက်သားနဲ့အရိုးတွေအတွက်ကောင်းမွန်စေပါတယ်။ သင့်ကလေးက နှစ်နှစ်မပြည့်သေးဘူးဆိုရင် ရှိသင့်တဲ့ ပေါင်ချိန်ထက် မကျော်လွန်နေဘူးဆိုရင် နွားနို့်များများသောက်သင့်ပါတယ်။ ၄) မြေပဲထောပတ် (သို့) မြေပဲစေ့များကိုလှော်ပြီး ကြိတ်ထားသော မြေပဲအနှစ် မြေပဲထောပတ်က ကလေးတွေအတွက် စွမ်းအင်တွေနဲ့ ပရိုတင်းဓာတ်တွေကို ရစေပါတယ်။ တစ်ချို့သော တံဆိပ်မြေပဲထောပတ်တွေကတော့ ဆားတွေ၊ သကြားတွေ၊ ထန်းဆီနဲ့ မပြည့်ဝတဲ့ ဟိုက်ဒရိုဂျင်ဓာတ်တွေ ထပ်ပေါင်းထည့်ထားတတ်တဲ့အတွက် အာဟာရဓာတ်တွေရဲ့စွမ်းအင်တွေကို လျော့ကျစေနိုင်ပါတယ်။ ၅) နှံစားပြောင်း အစာခြေလွယ်တဲ့အမျှင်ဓာတ်ပါဝင်တဲ့အတွက် အစာခြေစနစ်ကို ကောင်းမွန်စေပြီး ဝမ်းချုပ်ခြင်းမဖြစ်ပေါ်အောင် ကာကွယ်ပေးနိုင်ပါတယ်။ ၆) အသား ပရိုတင်းဓာတ်နဲ့ သံဓာတ်ပါဝင်ပါတယ်။ ဦးနှောက်ဖွံ့ဖြိုးဖို့ ကူညီပေးပြီး ဦးနှောက်လုပ်ဆောင်ချက်တွေကို အကောင်းဆုံးဖြစ်စေပါတယ်။ ခုခံစွမ်းအားတိုးစေပါတယ်။ ၇) ငါး ပရိုတင်းဓာတ်ကြောင့် ကြွက်သားနဲ့အရိုးတွေ သန်မာစေပါတယ်။ ဆော်လမွန်၊ တူနာ၊ ဆာဒင်း ငါးတွေမှာ အိုမီဂါသရီးဖက်တီအက်ဆစ်ပါဝင်ပါတယ်။ မျက်လုံးအမြင်အာရုံကောင်းစေပြီး ဦးနှောက်နဲ့အာရုံကြောဆိုင်ရာ တိုးတက်ဖို့ အထောက်အကူပေးပါတယ်။ ၈) ချိစ် ချိစ်က သင့်ကလေးရဲ့အရိုးသန်မာအောင် ကြီးထွားဖွံ့ဖြိုးအောင် လုပ်ဆောင်ပေးတဲ့ အဓိက ဓာတ်တွေအများကြီးပါဝင်ပါတယ်။ အထူးသဖြင့် ဗီတာမင် ဒီ၊ ပရိုတင်း၊ ကယ်လဆီယမ်၊ ဖော့စဖောရပ်စ် စသည်တို့ပါဝင်ပါတယ်။ ၉) ပန်းပွင့်စိမ်း ကလေးရဲ့ အမြင်အာရုံကို ကောင်းမွန်စေပြီး ဆဲလ်တွေ ပျက်စီးခြင်းကို ကာကွယ်ပေးနိုင်ပါတယ်။ အစာခြေစေတဲ့အမျှင်ဓာတ်ပါဝင်မှုကြောင့် ဝမ်းချုပ်ခြင်းကိုကာကွယ်ပေးနိုင်ပါတယ်။ ၁၀) အရောင်ရင့်တဲ့အသီးအနှံတွေနဲ့ အသီးအရွက်တွေ အထူးသဖြင့် ကန်စွန်းဥ၊ ဖရုံသီး၊ မုန်လာဥနီ၊ ခရမ်းချဉ်သီး၊ သင်္ဘောသီး စတဲ့အသီးအနှံတွေမှ betacarotene နဲ့ carotenoids ဓာတ်တွေပါဝင်ပါတယ်။ ထိုဓာတ်တွေက ခန္ဓာကိုယ်ထဲရောက်တဲ့အခါ ဗီတာမင်အေအဖြစ်ပြောင်းလဲပြီး အရေပြားနဲ့အမြင်အာရုံကောင်းစေပါတယ်။ ခန္ဓာကိုယ်ထဲကတစ်ရှူးတွေကို ပြုပြင်ပေးနိုင်ပြီး ကြီးထွားဖွံ့ဖြိုးစေနိုင်ပါတယ်။ ခုဖော်ပြထားတာတွေကတော့ ကလေးရဲ့အရိုးတွေကြွက်သားသန်မာမှုတွေအတွက်စားသင့်တဲ့အစားအစာတွေဖြစ်ပါတယ်။ ဒါပေမယ့် ကလေးကို ထိုအစားအစာတွေကျွေးရုံနဲ့ ကြီးထွားသန်မာလာမယ်လို့ အပြည့်အဝပြောလို့မရသေးပါဘူး။ အာဟာရပြည့်ဝအောင် မျှတစွာကျွေးသင့်တဲ့အပြင် ကလေးရဲ့အရိုးအဆစ်တွေသန်မာအောင် ဗီတာမင် ဒီရရှိဖိုလည်း လိုပါတယ်။ အထူးသဖြင့် မနက်ခင်းနေရောင်ခြည်က ကလေးရဲ့မျက်နှာ၊ လည်ပင်း၊ လက်မောင်း တို့နဲ့ထိတွေ့တဲ့အခါ ဗီတာမင်ဒီဓာတ်ရရှိပါတယ်။ အဓိကကတော့ ကယ်ဆီယမ်ဓာတ်နဲ့ ဗီတာမင် ဒီဓာတ်ဖြစ်ပါတယ်။ နောက်တစ်မျိုးကတော့ ကလေးကို ပြေးလွှားဆော့ကစားခိုင်းတဲ့နည်းပါပဲ။ ဒီနေ့ခေတ်မှာ လေကောင်းလေသန့်ရရှိနိုင်တဲ့ ပန်းခြံမျိုး၊ လွတ်လပ်စွာပြေးလွှားဆော့ကစားနိုင်တဲ့ မြင်ခင်းပြင်နဲ့ အားကစားကွင်းမျိုး ရှားပါးလာပါတယ်။ အမှန်တကယ်တော့ ကလေးငယ်တွေကို ထိုကဲ့သို့လွတ်လပ်စွာပြေးလွှားဆော့ကစားခိုင်းခြင်းက အရိုးအဆစ်တွေသန်မာစေပါတယ်။ စက်ဘီးစီးခိုင်းတာမျိုး၊ ရေကူးခိုင်းတာမျိုး၊ ပြေးခိုင်းတာမျိုး၊ စတဲ့ကစားနည်းတွေကလည်း သင့်ကလေးရဲ့အရိုးအဆစ်တွေ သန်မာစေဖို့ အကူအညီပေးနိုင်ပါတယ်။ နည်းပညာလွှမ်းမိုးမှုတွေများလာတဲ့ဒီနေ့ခေတ်မှာ screen time ကိုလျော့ချပေးပြီး လေကောင်းလေသန့်ရနိုင်မယ့် ပန်းခြံ၊ ကစားကွင်းတွေမှာ ပြေးလွှားဆော့ကစားခိုင်းခြင်းမျိုးလုပ်ခိုင်းပေးပါ။ အာဟာရဓာတ်တွေ မျှတအောင် ကျွေးမွေးပေးပါ။ အဲဒါဆိုရင်တော့ သင့်ကလေးကြီးထွားဖွံ့ဖြိုးမှုကို အထောက်အကူပြုစေပါလိမ့်မယ်။ #BAWA101
ငယ်ငယ်တုန်းက သင်ခဲ့ရသော ဘဝအတွက် အသိတရားများပေးတဲ့ ကဗျာလေးများ #BAWA101
ငယ်ငယ်တုန်းက သင်ခဲ့ရသော ဘဝအတွက် အသိတရားများပေးတဲ့ ကဗျာလေးများ #BAWA101
လူနေမှုဘဝ စိတ်ဓာတ်ခွန်အား ကိုးကားစာများ ကလေးပြုစုပျိုးထောင်ခြင်း
ကလေးငယ်လေးများကို သင်ကြားပေးသင့်သော အရေးကြီးသည့် လူမှုရေးအတတ်ပညာမျာ
ကလေးတွေကို ငယ်စဉ်ကတည်းက သင်ပေးထားသင့်တဲ့လူမှုရေးနဲ့ပတ်သက်တဲ့အတတ်ပညာတွေရှိပါတယ်။ ဘာတွေလဲဆိုတာ ဖတ်ကြည့်လိုက်ပါအုံး။
ကလေးကို ငယ်ငယ်ထဲက ငွေရေးကြေးရေးထိန်းသိမ်းတတ်အောင် ဘယ်လိုပျိုးထောင်မလဲ
လူကြီးဘဝမှာ ငွေကို ရေလိုသုံးတာတို့၊ လက်ဖွာတာတို့၊ မသုံးတတ်တာတို့ဆိုတာ ကလေးဘဝက စည်းကမ်းမလုပ်ပေးခဲ့လို့ပါ။ ငွေကြေးဆိုင်ရာ အကျင့်ကောင်းတွေကို ကလေးဘဝထဲက သင်ပေးထားသင့်ပါတယ်။ သင့်ကလေးကို ငွေကြေးဆိုင်ရာအကျင့်ကောင်းလေးတွေဖြစ်အောင် ဘယ်လိုပျိုးထောင်ပေးမလဲဆိုတာ ပြောပြပေးချင်ပါတယ်။ ၁) ပုံမှန်စုငွေသတ်မှတ်ပေးပါ။ သင့်ကလေးကို သင်က ကျောင်းမုန့်ဖိုးသတ်သတ်ပေးသလား။ ဒါမှမဟုတ် မုန့်ထည့်ပေးလိုက်ပြီး ငွေကို မထည့်ပေးတတ်ဘူးလား။ ဘယ်လိုပဲဖြစ်ဖြစ် သင့်ကလေးအတွက် တစ်ရက်ဘယ်လောက်ဆိုပြီး မုန့်ဖိုးသတ်မှတ်ပေးလိုက်ပါ။ ဆိုလိုတာက သင့်ကလေးကို မုန့်ဖိုး ၅၀၀ပေးတယ်ဆိုပါတော့။ ၂၀၀က စုဖို့သတ်မှတ်ပြီး ၃၀၀ဖိုးကို မုန့်ဝယ်ပေးလိုက်ပါ။ ဒါမှမဟုတ် မုန့်ထည့်ပေးတယ်ဆိုရင် ငွေ ၂၀၀ တန်တစ်ရွက်ကို ပြပြီး “သားအတွက်မုန့်ဖိုးကို သားစုဖို့နော်” ဆိုပြီး သူ့ရှေ့မှာတင် စုဘူးထဲထည့်ပေးပါ။ ၂) စုဘူးထားပေးပါ။ ကလေးအတွက် စုဘူးသပ်သပ်ထားပါ။ အထက်ကပြောသလို မုန့်ဖိုးပေးရင်မုန့်ဖိုးထဲက ဖယ်ပြီး စုဘူးထဲထည့်ခိုင်းပါ။ မုန့်ဝယ်ပေးရင် မုန့်ဖိုးကို ပြပြီး စုဘူးထဲထည့်ပေးပါ။ ကလေးစုဘူးကို ကလေးကိုယ်တိုင်သိမ်းဆည်းတဲ့အကျင့်လုပ်ပေးပါ။ ကလေးစုဘူးပြည့်ခါနီးလေ ကလေးက ပျော်လေလေဖြစ်တာကို သင်မြင်ရပါလိမ့်မယ်။ ၃) ရည်မှန်းချက်ထားခိုင်းပါ။ စုဘူးထဲ “သားမုန့်ဖိုး တစ်နေ့ဘယ်လောက်ထည့်စုမယ်နော်။ စုဘူးမပြည့်မချင်း မဖောက်ရဘူး၊ ကတိတည်မှ စုဘူးပြည့်တဲ့နေ့ သားလိုချင်တာ သွားဝယ်ပေးမယ်” အဲလိုမျိုး အပြန်အလှန်ကတိလုပ်ထားပါ။ စုဘူးမပြည့်မချင်း ကလေးက ပူဆာသမျှ ဘာမှမဝယ်ပေးမိပါစေနဲ့။ ဥပမာ။ အရုပ်ဆိုင်ကို ဝင်ပြီး အရုပ်ဝယ်ခိုင်းတာမျိုးပေါ့။ ငြင်းလဲမငြင်းပါနဲ့……အရုပ်ဆိုင်ထဲလိုက်သွားပါ၊ ကလေးလိုချင်တာကြည့်ပါစေ။ “သားလိုချင်တာကြည့်ထား….အိုကေ……ဈေးပါမှတ်ထားနော်။ ကြည့်လို့အကြိုက်တွေ့ပြီဆို မေမေတို့ ပြန်မယ်၊ စုဘူးပြည့်အောင်စုမယ်၊ စုဘူးပြည့်တဲ့နေ့ကျလာဝယ်ကြမယ်။ ဟုတ်ပြီနော်…..” အဲလိုမျိုးမလျော့မတင်းနည်းနဲ့ဆို ကလေးက သင့်ကိုကလန်ကဆန်လုပ်ပြီး ငိုယိုဂျီကျဝယ်ခိုင်းမှာမဟုတ်တော့ပါဘူး။ အမှန်တကယ် စုဘူးဖောက်တဲ့နေ့ကျရင်လည်း သူပြောခဲ့တဲ့အရုပ်ဆိုင်ကို သွားဝယ်ပေးလိုက်ပါ။ ၄) ငွေကို အကုန်လုံး သူ့လက်ထဲမထည့်ပေးလိုက်ပါနဲ့။ စုဘူးတော့ ပြည့်ပြီ။ စုဘူးဖောက်ကြမယ်။ ကလေးက သူ့နဲ့သူစုထားတဲ့ငွေတွေကို ကြည့်ပြီး ငွေစုရတာ သဘောကျလာပါလိမ့်မယ်။ တခုရှိတာက စုဘူးဖောက်ပြီးရင် စုဘူးထဲကငွေတွေအကုန်လုံးကို ကလေးကိုပေးကိုင်ပြီး သုံးခိုင်းတာမျိုးကို သတိထားပါ။ အဲဒါက ကလေးကို ငွေသုံးကြမ်းစေနိုင်ပါတယ်။ ငွေကို သူ့ဟာသူရေတွက်ပြီး သူလိုချင်တဲ့အရုပ်ကို ဝယ်ပေးမယ်။ ပိုတဲ့ငွေကို အိမ်က အကြီးအကဲကို ကန်တော့ဖို့ သင်ပေးပါ။ အဲဒါက ငွေကို သူလိုချင်တာဝယ်တတ်ပြီး လူကြီးကို သူ့မုန့်ဖိုးနဲ့ကန်တော့ခြင်းကို သူတန်ဖိုးထားတတ်လာပါလိမ့်မယ်။ ဥပမာ။ “သားမုန့်ဖိုးတွေကို ဘယ်သူကပေးတာလဲ” ဒါမျိုးမေးပါ။ “ဖေဖေမေမေက ပေးတယ်ဆိုရင် ဖေဖေမေမေက သားကိုချစ်လို့ပေးတာ။ ဖေဖေမေမေနဲ့လည်း ဆိုင်တယ်။ သားကပြန်စုထားတော့ တော်တာပေါ့။ ဒါပေမယ့် သားလိုချင်တာရရင် လူကြီးကို သားစုထားတဲ့ငွေထဲက ပြန်ကန်တော့တော့ သားကုသိုလ်ရတာပေါ့” ဆိုပြီး သိမ်းသွင်းပါ။ အိမ်မှာ အဖိုးအဖွားရှိရင် စုဘူးဖောက်တာနဲ့ အရုပ်အတွက် ငွေကိုဖယ်ထားပြီး ပိုတဲ့ငွေကို အဖိုးအဖွားကို ကန်တော့ခိုင်းလိုက်ပါ။ အဲဒါဆို ကြီးလာတဲ့အခါ ကလေးက အဖိုးအဖွားကို ကန်တော့ရကောင်းမှန်းသိသွားသလို၊ လိုချင်တာရအောင် စိတ်ရှည်ရှည်နဲ့ ငွေစုတတ်သွားပါလိမ့်မယ်။ ဒါမှမဟုတ်ရင်လည်း ပိုငွေကို နောက်ထပ်စုဘူးတစ်ဘူးအသစ်ထပ်ဝယ်ပြီး ပြန်စုခိုင်းထားလိုက်ပါ။ ၅) စဉ်းစားတတ်ပါစေ။ ကလေးက တစ်ခုခုကို လိုချင်လို့ ပူဆာတဲ့အခါ လိုအပ်လားမလိုအပ်လား ။ လိုအပ်တာဆိုရင် ဝယ်သင့်ကြောင်း၊ ကိုယ့်မှာလဲတကယ်မရှိသေးလို့ လိုအပ်နေတာမျိုးဆို ဝယ်ပေးမည့်အကြောင်း သေချာနားလည်အောင်ရှင်းပြပေးပါ။ လိုအပ်လို့ ဝယ်တာက သုံးတာဖြစ်ကြောင်း၊ မလိုအပ်ပဲ လျှောက်ဝယ်ပစ်တာက ဖြုန်းတာဖြစ်ကြောင်း၊ လျှောက်ဝယ်ပစ်ခြင်းက ငွေတွေအကုန်မြန်ကြောင်း၊ ဒုက္ခရောက်တတ်ကြောင်း၊ သုံးတာနဲ့ ဖြုန်းတာကို သေချာသိသွာေးအာင် သေချာစိတ်ရှည်ထားပြီးရှင်းပြပေးဖို့ လိုအပ်ပါတယ်။ ဥပမာ။ ကလေးကို မကြာသေးခင်က သူ့ဖိနပ်ပြတ်လို့အသစ်တစ်ရံ ဝယ်ပေးပြီးပြီဆိုပါတော့။ နောက်နေ့မှာ ဖိနပ်အသစ်တွေတွေ့လို့ထပ်ဝယ်ခိုင်းတာမျိုးဆိုရင် “သားဖိနပ်က ဘယ်နေ့ကဝယ်ထားတာလဲ။ ဒီဖိနပ်လည်း သားလိုချင်တာဝယ်ပေးတာပဲလေ။ အဲဒီ့တုန်းက ဖိနပ်ပြတ်သွားလို့ ဝယ်ပေးတာ၊ ဖိနပ်ပြတ်သွားတော့ စီးစရာရှိလား၊ ဖိနပ်မစီးဘဲ နေလို့ရလား၊ မရဘူးနော်။ အဲဒီ့တော့ ဖိနပ်ဝယ်မှဖြစ်မယ်၊ လိုအပ်တယ်နော်။ ဟုတ်ပြီ။ လိုအပ်လို့ သားကြိုက်တာကိုလည်း ရွေးပြီး ဝယ်ပေးလိုက်ပြီလေ။ ခုက ဝယ်ပြီးသားကြီးကို သားဆီမှာလည်း စီးစရာရှိပြီးကို ထပ်ဝယ်ဖို့ လိုအပ်လားသား….၊ စဉ်းစားကြည့်နော်……။ ခုတော့မလိုအပ်သေးဘူးမဟုတ်လား။ ခုဖိနပ်ပြတ်သွားတဲ့အခါ မေမေအသစ်ထပ်ဝယ်ပေးမှာပေါ့။ ဟုတ်ပြီလား” ဆိုပြီး ကလေးနားလည်မယ့် ဥပမာပေးပြီး စိတ်ရှည်ရှည်နဲ့ ရှင်းပြပေးပါ။ တစ်ခုရှိတာက ကလေးကို သူလိုချင်တာ၊ တကယ်လည်း လိုအပ်နေတာကို သူ့အတွက် ဝယ်ပေးတော့မယ်ဆိုရင် ကလေးကြိုက်တာကို ရွေးချယ်ခွင့်ပေးပါ။ ကလေးကြိုက်တာက အဆင်မပြေရင်တော့ ဘာကြောင့်အဆင်မပြေလဲဆိုတာပါ တစ်ခါတည်းရှင်းပြပေးပါ။ တစ်ချို့မိဘတွေက ကလေးဆန္ဒကို အလေးမထားဘဲ သူတို့ကြိုက်တာ၊ အဆင်ပြေမယ်ထင်တာ ဝယ်တတ်တဲ့အခါ ကလေးက မလိုချင်ဘဲ ၊ သူလိုချင်တဲ့အရာမျိုးထပ်တွေ့တဲ့အခါ ထပ်ပြီးဝယ်ပေးဖို့ ပူဆာတတ်လို့ပါ။ ၆) ပိုက်ဆံကို ခွဲခြားထားတာမျိုးမလုပ်ပါနဲ့။ တစ်ချို့တွေက ကလေးမုန့်ဖိုးရတဲ့အခါမျိုးမှာ ကလေးလက်ထဲပေးကိုင်ပြီး သားပိုက်ဆံဆိုပြီးလုပ်တတ်တာတွေ့ဖူးပါတယ်။ “သားပိုက်ဆံနဲ့သားလိုချင်တာဝယ်….ဖေဖေမေမေမယူဘူး” ဆိုပြီးလုပ်တတ်တာမျိုးပါ။ အဲလိုလုပ်တတ်ပြီး ကလေးပိုက်ဆံကို အဖေအမေကလုံးဝမယူပါဘူး။ ကလေးက ထိုငွေကိုကိုင်ပြီး ဆိုင်တကာလျှောက်ဝယ်ပစ်လိုက်တာမျိုးက ကလေးရဲ့ငွေကိုအသုံးချမှုကို ဆိုးရွားစေပါတယ်။ အဲလိုမျိုးအကျင့်လုပ်စရှိသွားရင် ကလေးက ငွေကို ကိုင်ပြီး သူ့စိတ်ထဲရှိရာဝယ်ရတာကို စွဲလမ်းသွားတတ်ပါတယ်။ ဖေဖေမေမေများ ကလေးပိုက်ဆံကို ကိုယ်လုံးဝမယူဘဲ ကလေးကိုပေးကိုင်တာက လုံးဝမမှန်ပါဘူး။ကလေးကို အကျင့်ပါပျက်သွားစေနိုင်ပါတယ်။ ကလေးဆိုတာက ကိုယ့်ကိုကိုယ်မထိန်းချုပ်နိုင်သေးပါဘူး။ ထိုအကျင့်ကိုစွဲလမ်းသွားတဲ့နောက်မှာ ကလေးကလိုချင်တာတွေရှိလာမှာပါပဲ။ အဲဒီ့အခါ ငွေရဖို့ သူစဉ်းစားလာမှာပါ။ ဘယ်သူမုန့်ဖိုးပေးမလဲ၊ ဘယ်သူ့ဆီက ပိုက်ဆံရမလဲ၊ ကျန်တာကိုတွေးမိမှာမဟုတ်ပါဘူး။ တစ်ယောက်ယောက်ဆီက ငွေရရင် သူလိုချင်တာတွေ ဝယ်နိုင်မယ်…..ကလေးက ဒီလောက်ပဲသိမှာပါ။ အဲဒီ့အခါမှာ အဖေအမေပိုက်ဆံတွေ့ရင် ယူထားလိုက်တာမျိုး၊ တစ်ယောက်ယောက်ရဲ့ပိုက်ဆံကို ယူထားလိုက်တာမျိုးတွေဖြစ်လာနိုင်ပါတယ်။ အဲဒါကြောင့် ကလေးလက်ထဲ မုန့်ဖိုးအဖြစ်ရောက်လာတဲ့ငွေကိုလည်း အဖေအမေက ထိန်းချုပ်ပါ။ ကလေးကိုမုန့်ဖိုးအဖြစ် ကလေးလက်ထဲငွေထည့်ပေးခြင်းကိုလည်း တားမြစ်ပါ။ ကိုယ်တိုင်လည်း မလုပ်ပါနဲ့။ ကလေးလက်ထဲရောက်လာရင်လည်း “ကလေးဆိုတာ ငွေကိုမသုံးတတ်သေးဘူး။ သားမုန့်ဖိုးကို မေမေကိုပေးထားနော်၊ သားလိုချင်တာရှိရင် မေမေကိုပြော၊ သားမုန့်ဖိုးနဲ့ ပြန်ဝယ်ပေးမယ်” ဆိုပြီး ကလေးကို ငွေပေးကိုင်ခြင်းမှ တားဆီးသင့်ပါတယ်။ ၇) ရင်းနှီးမြုပ်နှံတတ်အောင် သင်ပေးပါ။ ငွေဆိုတာက စုဆောင်းထားရုံနဲ့မပြီးတော့ပါဘူး။ ငယ်ရွယ်စဉ်အချိန်ကတည်းက ငွေကိုဘယ်လိုအသုံးပြုရတယ် ဘယ်လိုနေရာတွေမှာမြှုပ်နှံရတယ် ဘာကြောင့်မြှုပ်နှံရတယ် ဘာတွေသတိထားဖို့လိုတယ် ဆိုတာတွေကအစ တဖြည်းဖြည်းနားထဲဝင်အောင်သင်ပေးရမှာပဲဖြစ်ပါတယ်။ ရင်းနှီးမြှုပ်နှံမှုဆိုတာလူကြီးတွေကအစ မရင်းနှီးတဲ့ခေါင်းစဉ်တခုပါပဲ။ လူကြီးကိုယ်တိုင်က သေချာလေ့လာ သားသမီးတွေကို လက်ဆင့်ကမ်းရမည့် ပညာတစ်ခုပဲဖြစ်ပါတယ်။ ပညာရှင်တွေပြောကြားလေ့ရှိတဲ့စကားတစ်ခွန်းကတော့ လူတော်တော်များဟာငွေအတွက်အလုပ်လုပ်ကြပြီး တကယ်ချမ်းသာနေတဲ့သူတွေကတော့ ငွေဟာသူတို့အတွက် ပြန်အလုပ်လုပ်ေနေအောင် ရင်းနှီးမြှုပ်နှံထားတတ်သူတွေလို့ ပြောကြားပါတယ်။ ငွေကိုကိုင်တွယ်ပုံကို ထိန်းချုပ်ဖို့ကတော့ ကလေးအသက်အရွယ်အလိုက် မတူညီတတ်ပါဘူး ။ အထက်မှာဖော်ပြထားတာလေးတွေကတော့ ၄နှစ်ကနေ ၇နှစ်လောက်ထိတော့ သေချာပုံစံသွင်းပြီး ပျိုးထောင်ပေးလို့ရပါတယ်။ အဲဒီ့အသက်မှာ ငွေကိုင်ပုံစနစ်ကျအောင် မပျိုးထောင်မိရင် ရေရှည်မှာ ငွေနဲ့ပတ်သက်တဲ့မလိုလားအပ်တာတွေဖြစ်လာနိုင်ပါတယ်။ အားလုံးပဲ ကလေးတွေကို စနစ်တကျပျိုးထောင်နိုင်အောင်အကူအညီဖြစ်စေဖို့ ဒီစာဆောင်လေးကိုရေးသားမ ျှဝေလိုက်ရခြင်းဖြစ်ပါတယ်။#BAWA101
ကလေးမယူမီ စဉ်းစားသင့်သောအချက်များ
လောကမှာ မိသားစုတွေကသာ သင့်ဘဝအတွက် နွေးထွေးမှုအပေးနိုင်ဆုံးလူသားတွေဖြစ်ပါတယ်။ မိသားစုရှိခြင်းက သင့်ဘဝရဲ့ကောင်းခြင်း၊ ဆိုးခြင်းတွေကို အတူမျှဝေခံစားပေးမယ့် ရဲဘော်ရဲဘက်တွေရရှိခြင်းပါပဲ။ သင်က သာယာတဲ့မိသားစုဘဝကို အရမ်းနှစ်ခြိုက်လိုချင်မိလို့ မိသားစုဘဝလေးစတင်ဖန်တီးမယ်လို့ စဉ်းစားထားတယ်ဆိုရင်တော့ အရမ်းကို ပျော်စရာပါပဲ။ ဒါပေမယ့် မိသားစုဆိုတာနဲ့အညီ သင်တစ်ဦးတည်းမဖြစ်နိုင်တော့တဲ့အတွက် အပြန်အလှန်တာဝန်ယူမှု၊ တာဝန်သိတတ်မှု၊ ဖေးမနားလည်စာနမှုတွေ လိုအပ်လာမှာပါ။ အဲဒါအပြင် သင်မိသားစုရဲ့ဆည်းလည်းလေးဖြစ်လာမယ့် သားသမီးလေးလည်း သင်လိုချင်လာမှာအမှန်ပါပဲ။ အဲဒီ့အခါမှာ သင်ရော သင့်အိမ်ထောင်ဖက်ရော စဉ်းစားပြီး တာဝန်ပိုယူရမယ့် ကိစ္စတွေပါလာပါတော့တယ်။ သာယာတဲ့မိသားစုဘဝကို ပိုင်ဆိုင်ထားသူက ဘဝမှာ ကံအကောင်းဆုံးပါပဲ။ အဲလိုသာယာတဲ့မိသားစုဘဝကို ပိုင်ဆိုင်ဖို့ကတော့ သင်ကော သင့်မိသားစုတွေမှာပါ တာဝန်ရှိပါတယ်။ သင်တာဝန်ယူနိုင်ပြီလို့ သင့်ကိုသင်ထင်တဲ့အချိန်မှာ သင့်ရဲ့မိသားစုဘဝပိုပြီး သာယာလာအောင် စွမ်းဆောင်နိုင်မှာဖြစ်ပါတယ်။ သင်ကိုယ်တိုင်လည်း တကယ်ပျော်ရွှင်တဲ့မိသားစုဘဝကို ပိုင်ဆိုင်နိုင်မှာပါ။ အဲဒီလိုမဟုတ်ဘဲ ပေါ့ပေါ့လေးပဲတွေးလိုက်ပြီး တည်ဆောက်မိတယ်ဆိုရင်တော့ သင့်အတွက် အခက်အခဲတွေ၊ တာဝန်တွေ၊ စိတ်ဖိစီးမှုတွေ၊ စိတ်ရှုပ်ထွေးစရာတွေ အများကြီးပဲ ရရှိလာနိုင်ပါတယ်။ အဲဒါကြောင့် သာယာတဲ့မိသားစုဘဝလေးတည်ဆောက်ဖို့ အတူတကွတာဝန်ခွဲဝေယူနိုင်မယူနိုင် သင့်ကိုသင် ပြန်မေးသင့်သလို သင့်ရဲ့လက်တွဲဖော်နဲ့လည်း သေချာတိုင်ပင် အစီစဉ်ဆွဲပြီးမှ တာဝန်ခွဲဝေယူတာအကောင်းဆုံးပါ။ အဲဒီ့တော့ သင်တို့နှစ်ယောက်လုံး အောက်မှာဖော်ပြထားတဲ့မေးခွန်းလေးတွေကို နှစ်ယောက်တူတူစဉ်းစားတိုင်ပင်ကြည့်ပါအုန်း။ ၁) ကလေးတစ်ယောက်ရဲ့တာဝန်ယူဖို့အဆင်သင့်ဖြစ်ပြီလား ကလေးတစ်ယောက်ရဲ့တာဝန်ဆိုတာထက် လူသားတစ်ယောက်လူကောင်းသူကောင်းဖြစ်အောင် ကလေးတစ်ယောက်ရဲ့ဘဝတစ်ခုလုံးကို ကျွေးမွေးစောင့်ရှောက်ဖို့ တာဝန်ဆိုတာ နည်းတဲ့တာဝန်တော့မဟုတ်ပါဘူး။ ကလေးလေး သင့်ရဲ့ခန္ဓာကိုယ်မှာ သန္ဓေစတည်ကတည်းက သင်က အရေးတယူနဲ့ စောင့်ရှောက်တဲ့တာဝန်ကိုယူရတော့မှာပါ။ သင့်ရဲ့ခန္ဓာကိုယ်မှာ သူကောင်းစွာဖွံ့ဖြိုးနေဖို့၊ အပြင်လောကကို ရောက်လာတဲ့အခါ သူနေထိုင်ကောင်းဖို့၊ ဝတ်ဖို့စားဖို့၊ ကျန်းမာဖို့ စသည်ဖြင့် စုံလို့ပါပဲ။ အဲဒါတွေအတွက် သင်အဆင်သင့်ဖြစ်နေပြီလားဆိုတာ ကြိုတင်တွေးတောထားသင့်ပါတယ်။ ကလေးတစ်ယောက်ကိုပဲ အချိန်အပြည့်အဝပေးထားဖို့ သင့်ရဲ့အချိန်တွေကို ပေးဖို့ကော သင့်အတွက် အဆင်ပြေနိုင်ရဲ့လား။ သင့်ကိုသင်ပြန်မေးသင့်ပါတယ်နော်။ သင့်ဘဝရဲ့အချိန်တော်တော်များများကို သင်ပြန်သုံးသပ်ပြီး စဉ်းစားပါ၊ ကလေးတစ်ယောက်ကို တာဝန်ယူနိုင်ဖို့ အဆင်သင့်ဖြစ်မဖြစ်တွေးပါ။ ၂) စားဝတ်နေရေးအတွက် ငွေကြေးကိစ္စ အဆင်ပြေနိုင်ရဲ့လား ကလေးလေးက လောကထဲကိုရောက်ပြီဆိုတာနဲ့ သင်တို့မိသားစုအတွက် ဘတ်ဂျက်က အရင်ကထက်ပိုပြီးလိုအပ်လာပါပြီ။ သင့်တို့ကိုယ်သင်တို့အချိန်ပေးနိုင်ဖို့ထက် သူ့အတွက်ကို သင်တို့ရဲ့အချိန်တော်တော်များများကို သင်တို့ကိုယ်တိုင်လိုလားစွာပေးနိုင်မှဖြစ်မှာပါ။ အဲဒါက ငွေကြေးနဲ့လည်း သွယ်ဝှိုက်ပြီးပတ်သက်မှုရှိနေနိုင်ပါသေးတယ်နော်။ အကယ်၍များ သင်တို့မှာ လုံလောက်တဲ့ငွေကြေးမရှိဘူးဆိုရင် ငွေကြေးကိုလုံလောက်အောင်အရင်စုဆောင်းထားသင့်ပါတယ်။ ဘာလို့လဲဆိုတော့ ကလေးတော့ယူလိုက်ပါပြီ၊ ကလေးလေးအတွက် သင်တို့ ငွေကြေးမလုံလောက်နိုင်လို့ သင်တို့နှစ်ယောက်လုံးက အလုပ်ကိုယ်စီထွက်လုပ်နေမယ်ဆိုရင် အိမ်မှာ ဂရုစိုက်ပေးမယ့်သူရှိရင်ကောင်းပါရဲ့၊ ဂရုစိုက်ပေးမယ့်သူမရှိတော့ သင်တို့အတွက် ကသိကအောက်ဖြစ်လာနိုင်ပါတယ်။ ကလေးကိုလည်း စိတ်မချနိုင်၊ ငွေလဲမရှာဘဲနေလို့မရပြန်နဲ့ အရင်ကထက်တောင် စိတ်ဖိစီးမှုပိုတိုးလာနိုင်ပါတယ်။ ၃) အချိန်ပေးနိုင်ရဲ့လား ငွေကလည်းအရေးကြီးတဲ့အထဲပါသလို၊ ကလေးကို တာဝန်ယူပြီးအချိန်ပေးနိုင်ဖို့လည်း အရေးကြီးပြန်တယ်။ အရင်ကလို သင်တို့နှစ်ယောက်တည်း ရုပ်ရှင်ကြည့်မယ်၊ မုန့်တွေဝယ်စားမယ်၊ ဈေးဝယ်ထွက်မယ်၊ သူငယ်ချင်းတွေနဲ့ သောက်မယ်စားမယ် ပျော်မယ်ပါးမယ် ဆိုတာမျိုးတွေ လွတ်လပ်စွာလုပ်လို့မရတော့လောက်အောင် သင့်တို့ရဲ့ကလေးလေးကိုပဲ အချိန်တွေပေးထားရမှာပါ။ သူ့ရဲ့ကျန်းမာရေး၊ သန့်ရှင်းရေး၊ စားသောက်မှု စသည်ဖြင့် အချိန်တိုင်းလိုလိုမှာ သူ့ကိုစောင့်ရှောက်ကြည့်ရှုဖို့ အချိန်တွေချည်းဖြစ်နေမှာပါ။ အဲဒီ့အခါ ငွေကြေးလုံလောက်ဖို့အတွက်လည်း ပူပန်လာရမှာဖြစ်သလို ၊ သင်တို့ရဲ့အနားယူချိန်တွေ၊ အားလပ်ချိန်တွေကိုလည်း သူ့အတွက်ထည့်သွင်းစဉ်းစားလာရမှာဖြစ်ပါတယ်။ အိမ်ပြန်ရောက်ချိန်မှာဆိုရင်လည်း အမျိုးသမီးကလည်း အမျိုးသမီးအလျောက် အမျိုးသားကလည်း အမျိုးသားအလျောက် ကိုယ်စီ တာဝန်တွေခွဲဝေယူရမှာမို့ သင်တို့ကိုယ်ပိုင်အချိန်ဆိုတာလည်း မရှိသလောက်ကို ရှားပါးလာမှာပဲဖြစ်ပါတယ်။ အဲဒါကြောင့် ပိုပြီးလည်း စိတ်ဖိစီးမှုတွေများလာနိုင်တာမို့ သင့်ကိုသင်ပြန်မေးသင့်တဲ့အချက်ထဲမှာလည်း ဒီအချက်ကပါဝင်နေပြန်ပါတယ်။ ၄) ကလေးကို ပြုစုစောင့်ရှောက်၊ သွန်သင်ဆုံးမနိုင်ပြီလား သင့်ရဲ့အသက်အရွယ်နဲ့လည်း သက်ဆိုင်နေပြန်ပါတယ်။ သင်က ခုမှ လူငယ်လူရွယ်ဘဝနဲ့ပဲကုန်ဆုံးရတာပျော်နေသေးတဲ့သူလား၊ ဒါမှမဟုတ် ကလေးယူဖို့ အသက်ငယ်လွန်းနေသေးလား။ ကလေးကို တာဝန်ယူထိန်းကျောင်းဖို့ ကိုယ့်မှာအဆင်သင့်မဖြစ်သေးဘူးလို့ ကိုယ့်ကိုကိုယ်ထင်နေမိလား။ အဲဒါကလည်း သင့်ကိုသင်ပြန်မေးသင့်ပါတယ်နော်။ ကလေးကို တာဝန်မယူနိုင်သေးဘူးလို့ ကိုယ့်ကိုကိုယ်ထင်နေတယ်ဆိုရင် မယူသေးတာအကောင်းဆုံးပါပဲ။ တာဝန်မယူနိုင်သေးချိန်မှာ ကလေးယူမိရင် ကလေးအတွက်ကော ၊ ကိုယ့်အတွက်ကော ပိုပြီး ဖိစီးမှုဖြစ်နိုင်ပါတယ်။ ပြီးတော့ ကိုယ်တိုင်က ကလေးကိုပြုစုစောင့်ရှောက်ဖို့ ၊ လူကောင်းတစ်ယောက်ဖြစ်လာအောင် သွန်သင်ဖို့ အသိဉာဏ်ပိုင်း၊ ဗဟုသုတပိုင်းမှာ လိုအပ်နေသေးတယ်ဆိုရင် မယူသေးတာပိုပြီး ကောင်းပါတယ်။ သင်တို့ခေါ်လို့ လူ့လောကထဲရောက်လာတဲ့ကလေးက အပြစ်မရှိပါဘူး။ ကလေးမှာလည်း မလိုအပ်ပဲ ဆိုးကျိုးတွေဖြစ်လာနိုင်ပါတယ်။ ၅) ကလေးကြောင့် ဖြစ်လာတဲ့ ပျော်ရွှင်မှု၊ အံ့သြမင်သက်မှု၊ ဖိစီးမှုတွေ၊ ပင်ပန်းမှုတွေ၊ စိတ်ရှုပ်ထွေးမှုတွေ ကို လက်ခံနိုင်ရဲ့လား သင့်အိမ်ထောင်ရေးမှာ ကလေးလေးရှိလာတဲ့အခါ အရင်ကထက် ပိုပြီးသာယာတဲ့အိမ်ထောင်ရေးဖြစ်လာမှာလည်း သေချာသလို၊ သူ့ကို ဂရုစိုက်ရတာ၊ အချိန်ပေးရတာပိုများလာမှာ၊ စိတ်ဖိစီးမှုတွေ၊ ပင်ပန်းမှုတွေများလာမှာလည်း အသေအချာပါပဲ။ အဲဒါတွေကို သင်လိုလားနှစ်သက်နိုင်ရဲ့လား။ အရင်က လကုန်ရက်ဆို သင်တို့နှစ်ယောက်လုံး ပျော်ရွှင်စွာ ဈေးဝယ်မယ်၊ ရုပ်ရှင်ကြည့်မယ်၊ လည်ချင်ရာလည်မယ်ဆိုပြီး လွတ်လပ်နေပေမယ့် ကလေးတစ်ယောက်ရှိလာတဲ့အခါ အိမ်ကိုပဲတန်းပြန်ပြီး သူညနေစာစားပြီးရဲ့လား၊ အာဟာရပြည့်ဝအောင်ကောစားရဲ့လား၊ ထမင်းကောင်းကောင်းစားဝင်ရဲ့လား ဆိုပြီး သင်တွေးတောပူပန်နေရမှာပါ။ သင်တို့ ပင်ပန်းလို့ နားနေမယ့်အချိန်မှာ ကလေးက သင့်ကိုပုံပြောပြဖို့ ဂျီကျနေတာမျိုး၊ အရုပ်တွေနဲ့အတူဆော့ကစားပေးဖို့ အကူအညီတောင်းနေတာမျိုးလည်း ကြုံလာရမှာပါ။ => သင်ကအိပ်ပျော်နေချိန်မှာ ကလေးက နိုးနေပြီး သင့်ကို နိုးနေတာမျိုးကို အမြဲတမ်းလိုလို ကြုံတွေ့ရမှာပါ။ => သင်ကတစ်နေ့လုံး အိမ်အလုပ်တွေနဲ့ ရှုပ်နေပြီး အလုပ်တွေပြီးလို့နားမယ့်အချိန်မှာ သင့်ကလေး ဧည့်ခန်းမှာ ဖွထားတဲ့အရုပ်တွေကို သင်စိတ်ပျက်လက်ပျက်တွေ့ရမှာပါ။ => သင့်အလုပ်ကလုပ်ဖော်ကိုင်ဖက်တွေက ပါတီမှာ အစွမ်းကုန်ကဲမယ့်အချိန်မှာ သင်ကတော့ သင့်ကလေးနေမကောင်းလို့ ပါတီနားတောင် မဝဲသီလိုက်ရဘဲ အိမ်ပြန်ချင်ပြန်ရမှာပါ။ => ပင်ပန်းလွန်းလို့ သင်ခဏလေးမှေးခနဲ အိပ်မယ့်ဆိုရုံရှိသေး ဗြဲကနဲ အော်ငိုလိုက်တဲ့ ကလေးငိုသံက ကြားရလွန်းလို့ မထူးဆန်းတော့တဲ့ အခြေအနေမျိုးလည်းကြုံရမှာပါ။ => ကိုယ်ကခရီးသွားတာဝါသနာပါသလောက် အများဆုံးကိုယ်လုပ်နိုင်တာက သူငယ်ချင်းတွေသွားထားတဲ့ခရီးကပုံလေးတွေကို ဖေ့စ်ဘွတ်မှာ သရေကျရုံလေးသာ တတ်နိုင်မှာပါ။ စသည်ဖြင့်ပေါ့နော်။ ကလးရှိလာတဲ့အခါ သင့်ကလေးလေးရဲ့မပီတပီစကားသံက သင့်ကိုအမောပြေစေနိုင်သလို သူ့ရဲ့ မသိလိုက်မသိဘာသာ ပြုမူလိုက်တဲ့အပြုအမူတစ်ချို့ကြောင့်လည်း သင်ရင်မောချင်ရင်မောရမှာပါနော်။ ဘယ်အရာမဆို အကောင်းနဲ့အဆိုးဒွန်တွဲနေသလိုပါပဲ သင့်ရဲ့အိမ်ထောင်ရေးက ကလေးလေးကြောင့်ပိုပြီးသာယာတည်မြဲလာသလို သင်မထင်မှတ်ထားတဲ့ ဖိစီးမှုတွေ၊ တာဝန်တွေ၊ စိတ်ရှုပ်ထွေးမှုတွေလည်း သင်တစ်ပြိုင်တည်းလက်ခံရမှာဖြစ်ပါတယ်။ အဲဒီ့တော့ အထက်ပါအချက်လေးတွေကို ဖတ်ကြည့်ပြီး လက်တွဲဖော်နှစ်ယောက် ဆွေးနွေးတိုင်ပင်သင့်ပါတယ်။ အိမ်ထောင်ပြုမယ် ကလေးယူမယ်ဆိုရင် ဘာတွေဖြစ်မလဲဆိုတာကို ကြိုတင်သိထားသင့်ပါတယ်။ အချို့ သောလက်တွဲဖော်တွေကတော့ ဘာမှလည်းအဆင်သင့်မဖြစ် ၊ ကလေးတွေကို တပြွတ်ပြွတ်မွေးပြီး ငွေရေးကြေးရေးအဆင်မပြေဖြစ်တဲ့အခါ အိမ်ထောင်ရေးတွေကွဲကြပြဲကြ ပြီးရင် သားသမီးတွေကိုမဲကြပြုကြတာတွေလည်း တွေ့နေကြပဲဖြစ်ပါတယ်။ အပေါ်မှာမေးထားတဲ့မေးခွန်းတွေကို အဆင်သင့်ဖြစ်ပြီဆိုရင်တော့ ယူကြပါ။ ပျော်စရာကြီးပါ။ အဆင်သင့်မဖြစ်သေးဘူးဆိုရင်တော့ ကိုယ့်ချစ်ရသောသူ ကိုယ့်လက်တွဲဖော်ကိုယ်ဝန်မရလေအောင် ကြိုတင်ကာကွယ်ရမှာပဲဖြစ်ပါတယ်။ ကြိုတင်ကာကွယ်နည်းအမျိုးမျိုးကိုတော့ နီးစပ်ရာကျွမ်းကျင်ဆရာဝန်နဲ့ တိုင်ပင်စုံစမ်းပြီး မိမိချစ်ရသောသူကိုကာကွယ်ကြပါလို့ တိုက်တွန်းအကြံပေးလိုက်ရပါတယ်ခင်ဗျာ။ ယခုပို့စ်ဖြစ်မြောက်စေရန် ဂျာမဏီနိုင်ငံထုတ် နိုင်ငံတကာအရည်အသွေးပြည့်မီတဲ့ Masculan Condom မှကူညီဖော်ပြပေးသွားပါတယ်။ အားလုံးပဲချစ်ရသောသူတွေနဲ့ ပျော်ရွှင်သောမိသားစုဘဝလေးပိုင်ဆိုင်နိုင်ကြပါစေ။ #BAWA101