တစ်ချို့သူငယ်ချင်းတွေရှိပါတယ်။ စာဖတ်တာ ကောင်းမှန်းသိတယ်၊ အဲဒါကြောင့် စာဖတ်ချင်ပါတယ်…..ဒါပေမယ့် ဘာက စဖတ်ရမှန်းမသိဘူး၊ အဲဒါနဲ့တင် ဘာမှမဖတ်ဖြစ်တော့ဘူးဆိုတာမျိုးပေါ့။ အဲလိုမျိုး စိတ်ကောင်းဝင်လို့ စာဖတ်တဲ့အကျင့်ကို စလုပ်တော့မယ်ဆိုရင် ဘယ်စာကိုဖတ်ရမလဲဆိုပြီး စစဉ်းစားပါတော့မယ်။ အဲလိုစစဉ်းစားတာနဲ့ စပြီးခေါင်းရှုပ်တော့တာမျိုးမဖြစ်ရအောင် ပြောပြပေးချင်ပါတယ်။ အဓိကက စာဖတ်ကျင့်ဖြစ်ဖို့ပါပဲ၊ အဲဒါကြောင့် သင်ကြိုက်နှစ်သက်တဲ့စာအုပ်အမျိုးအစားကိုသာ ရွေးဖတ်ပါလို့ပဲ ပြောချင်ပါတယ်။ ခုမှ စာစာဖတ်မှာဖြစ်တဲ့အတွက် ဖတ်မိတဲ့စာထဲမှာ ပျော်ဝင်နှစ်သက်မိဖို့လိုပါတယ်။ အဲလိုမှမဟုတ်ဘဲ ဘာစာအုပ်ကို ဖတ်၊ ဘာအကြောင်းရာကိုဖတ် အရမ်းကောင်းတယ်ဆိုပေမယ့်လည်း သင်မကြိုက်တဲ့အကြောင်းအရာရေးထားတဲ့စာအုပ်မျိုးဆို စဖတ်မိတာနဲ့ သင်စိတ်ညစ်တော့တာပါပဲ။ ဘာတွေရေးထားမှန်းမသိပါဘူး….ဆိုပြီး စာထဲကအကြောင်းရာကို ဆက်တွေးဖို့ သင်ပျင်းမယ်၊ အဲဒီတော့ သင်စာအုပ်ကို ဖတ်ရတာပျင်းတာမျိုးဖြစ်လာပါမယ်။ အဲဒါဆို သင်စာဖတ်ကျင့်ရဖို့ မလွယ်ပါဘူး။ စာဖတ်ရတာပျော်မှ စာကိုပိုပြီးဖတ်ချင်မယ်၊ ဖတ်နေရင်းနဲ့ ကိစ္စပေါ်လာလို့ စာအုပ်ကိုချထားရမယ်ဆိုရင်တောင် လက်ကမချချင်လောက်အောင် သင်ပျော်ဝင်နိုင်မယ့် သင်ကြိုက်တဲ့စာအုပ်ဖြစ်ဖို့လိုပါတယ်။ အဲဒါကြောင့် ခုမှ စပြီး စာဖတ်ပါမယ်ဆိုရင် သင်ကြိုက်မယ့်အကြောင်းအရာအကြောင်းစာအုပ်ကို ရွေးပါ။ ဥပမာ။ သင်က သည်းထိတ်ရင်ဖို ဇာတ်ကားမျိုးတွေမှ ကြည့်တတ်တဲ့သူဆိုရင် စာအုပ်ကိုလည်း သည်းထိတ်ရင်ဖို၊ စုံထောက်စာအုပ်မျိုးကို ရွေးဖတ်ပါ။ အဲဒါမှ သင်စာအုပ်ကို ကြိုက်မှာပါ။ အဲလိုမဟုတ်ဘဲ သင်က အရမ်း romantic ဖြစ်တဲ့ဇာတ်လမ်းမျိုးတွေကိုမှ ကြိုက်တတ်သူဆိုရင် အချစ်ဇာတ်လမ်း၊ စာအုပ်မျိုးတွေ ဖတ်ပါ။ အဲဒါမှ သင်မပျင်းမှာပါ။ အဓိကက သင်ကိုယ်တိုင်စာအုပ်ထဲမှာ ပျော်ဝင်နှစ်သက်သွားပြီး လက်ကမချချင်လောက်အောင် ဖြစ်သွားရင် သေချာပါပြီ သင်စာဖတ်ဖြစ်ကို ဖြစ်တော့မှာပါပဲ။ ဘာလို့ဆို ဒီနေ့နဲ့ဖတ်လို့မပြီးတဲ့စာအုပ်ကို လက်ကမချချင်ဖြစ်နေတဲ့စာအုပ်ကို အားတာနဲ့ကောက်ကိုင်ပြီး နောက်တစ်ခန်းဖတ်ဖို့ စိတ်သန်နေမှာမို့လို့ပါပဲ။ အဲဒါဆို သင်စာဖတ်ဖို့ ဘယ်သူကမှ တကူးတက တိုက်တွန်းစရာမလိုဘဲ သင်စာဖတ်ဖြစ်နေပါပြီနော်။
ကဲ…..စာအုပ်တွေတော့ ဖတ်ဖြစ်နေပြီ ဆိုရင် စာအုပ်ကို ဖတ်တယ်၊ ခဏလေးနဲ့ ဘယ်နှစ်အုပ်ဖတ်ပြီးသွားတယ်ဆိုပြီး ဂုဏ်ယူတတ်ကြတာတွေ့ဖူးပါတယ်။ (အက်မင်ကတော့ တစ်အုပ်ကို အကြာကြီးဖတ်ရပါတယ်။ ဘာလို့ဆို ဖတ်ပြီးတိုင်း မျက်လုံးထဲမှာ ပုံဖော်တယ်၊ စဉ်းစားတယ်၊ စာအုပ်ထဲက ဇာတ်ကောင်နေရာမှာသာ ကိုယ်ဆို..ဘယ်လို၊ ဇာတ်ကောင်က ဘယ်လောက်တောင်ဆိုးသလဲ ဆိုတာမျိုး၊ ဇာတ်ကောင်က ဘယ်လောက်တောင် တော်သလဲ၊ ဒီလိုလူမျိုးတွေများလာရင်ကောင်းမှာပဲဆိုတာမျိုး၊ ဖတ်လိုက် ပုံဖော်လိုက်၊ စဉ်းစားလိုက်နဲ့ တစ်အုပ်ကို တော်တော်ကြာအောင်ဖတ်ရပါတယ်။)
ပြောချင်တာက စာဖတ်ပြီးရင် မြန်မြန်ဖတ်ပြီး မြန်မြန်ပြီးသွား၊ စာအုပ်ထဲက တကယ့်ပေးချင်တဲ့မက်ဆေ့က ဘာလဲ မသိလိုက်တာမျိုး မဖြစ်စေချင်ပါဘူး။ စာဖတ်ရင်း တွေးတော စဉ်းစားပေးပါလို့။ အဲဒီ့အကျင့်ကို သင့်ရဲ့ဦးနှောက်ကို အလုပ်လုပ်ခိုင်းတာဖြစ်တဲ့အတွက် သင့်ဦးနှောက်ရဲ့လုပ်ဆောင်ချက်တွေ ၊ စွမ်းရည်တွေ တိုးလာစေနိုင်ပါတယ်။
စာစဖတ်ချင်း ရှောင်သင့်တာ တစ်ခုရှိတာက စာအုပ်က သင့်အကြိုက်ဖြစ်မယ်၊ ရိုးရှင်းပြီး တွေးတောနိုင်တဲ့စာအုပ်မျိုးဖြစ်ဖို့တော့ လိုပါတယ်။ အရမ်းခက်တာမျိုးတော့ မရွေးပါနဲ့။ အရမ်းခက်ခဲတဲ့စာအုပ်မျိုးကို သူများကညွှန်းတိုင်း ရွေးပြီး ဖတ်မိရင် ငါးပါးမှောက်ပါလိမ့်မယ်။ ဖတ်နေကျသူအတွက် လွယ်ချင်လွယ်နေပေမယ့် ခုမှ စဖတ်မယ့်သူအတွက်ကတော့ ဖတ်လိုက်တာနဲ့ ပြန်တွေးလို့ နားမလည်နိုင်တဲ့စာအုပ်မျိုး၊ ဘာကိုဆိုလိုမှန်းမသိတဲ့စာအုပ်မျိုး၊ ဖတ်ပြီးစဉ်းစားတဲ့အခါ အဖြေဖော်ရခက်တဲ့စာအုပ်မျိုး (ပဟေဋ္ဌိ စာအုပ်မျိုး ဆိုလိုတာမဟုတ်ပါ)၊ မှတ်ရခက်တဲ့စာအုပ်မျိုးတွေကိုတော့ ရှောင်သင့်ပါတယ်။ ထိုစာအုပ်မျိုးဖတ်မိရင် စာဖတ်တာကို စိတ်ညစ်သွားတတ်ပါတယ်။ နောက်နေ့ စာအုပ်ကို ကိုင်ချင်စိတ်ဖြစ်တော့မှာမဟုတ်ပါဘူး။ ဘာစာအုပ်ကြီးမှန်းလည်း မသိပါဘူး၊ နောက်နေ့မှဖတ်တော့ပါမယ်၊ ဆိုရာကနေ ထပ်ပြီး စာဖတ်တဲ့ဆီရောက်တော့မှာမဟုတ်ပါဘူး။
အဲဒါကြောင့် စာဖတ်ကျင့်လည်း တကယ်ဖြစ်ချင်တယ်၊ စာလည်း စဖတ်ဖို့ တကယ်ကြိုးစားမယ်ဆိုရင် ကိုယ်ကြိုက်တာကိုသာရွေးဖတ်ပါ၊ ဖတ်လိုက်တာနဲ့ စာအုပ်ထဲမှာ အလိုက်သင်နစ်ဝင်သွားမယ်စာအုပ်မျိုးဖြစ်ပါစေ။ ဖတ်ပြီးတွေးတောတဲ့အခါ ကိုယ်သဘောပေါက်လွယ်တဲ့စာအုပ်မျိုးဖြစ်ပါစေ လို့ တိုက်တွန်းပြောပြလိုက်ရပါတယ်။
အားလုံးပဲ စာဖတ်ကျင့်လေး စတင်နိုင်ကြပါစေ။#Bawa101