အထူး စိတ်ဝင်စားဖွယ်၊ သိမှတ်ဖွယ်၊ အကြောင်းအရာ အသစ်တွေထွက်တိုင်း လစဥ် မိမိ အီးမေးလ်ထဲမှာ တန်းဖတ်လို့ ရချင်တယ်၊ ဘဝရဲ့ Facebook စာမျက်နှာနဲ့ Website မှာ တင်ဆက်သွားမယ့် အကြောင်းအရာများအပြင် အခြားသော သီးသန့် ဆောင်းပါးတွေကို ဖတ်ချင်တယ်ဆိုရင် ကိုယ့် မေးလ်လိပ်စာလေးတွေ ချန်ခဲ့ပေးပါ။

အလင်းရှိနေသမျှတော့ အမှောင်လည်းရှိအုံးမှာပါပဲ။ ဘဝရှင်သန်နေသမျှတော့ အကောင်းကြုံသလို အဆိုးလည်းကြုံနိုင်သေးတာပါပဲ။ အဓိကကတော့ ဘာတွေကြုံကြုံအနိုင်ပြန်ယူနိုင်ဖို့ပါပဲ။

ဆရာတော်ကြီးတွေရဲ့ တရားသဘောအရပြောရရင်တော့ “ခန္ဓာရှိနေသမျှတော့ ဝေဒနာရှိမှာပဲ” ဆိုတဲ့ စကားလိုပါပဲ။ ဘဝမှာ ရှင်သန်နေသမျှတော့ အကောင်းကြုံသလို အဆိုးလည်း ကြုံနိုင်သေးတာပါပဲ။ အဆိုးကြုံနေပေမယ့်လည်း အချိန်တန်ကျော်ဖြတ်နိုင်ပြီး အကောင်းကြုံအောင်လည်း ကြိုးစားနိုင်သေးတာပါပဲ‌နော်။


အဓိကကတော့ အဆိုးကြုံချိန်မှာတင် အရှုံးမပေးလိုက်ဖို့အရေးကြီးတာပါ။ တနည်းအားဖြင့်တော့ အဆိုးကြုံနေချိန်မှာ “ငါအဆိုးတွေကြုံနေပြီ၊ ဒီအဆိုးကိုမကျော်နိုင်ဘူး” ဆိုတဲ့စိတ်နဲ့ ဇာတ်မသိမ်းသွားဖို့က ပိုအရေးကြီးတာပါ။ အဲဒီလိုအဆိုးတွေ၊ အခက်အခဲတွေရင်ဆိုင်နေရချိန်မှာ အတွေးတွေကလည်း အဆိုးဘက်ကသာများနေတတ်ပါတယ်။ တနည်းအားဖြင့် ကိုယ်ရင်ဆိုင်နေရတဲ့အဆိုးကိုသာ မြင်းမိုရ်တောင်ကြီးပမာ မကျော်လွှားနိုင်တော့ဘူးရယ်လို့ ထင်နေတတ်ကြပါတယ်။ အဲဒီလို “အဆိုးကို မကျော်လွှားနိုင်ဘူး”ဆိုတဲ့ နံရံကာဆီးထားတဲ့အတွက်ကြောင့် နံရံရဲ့တဖက်က ကောင်းခြင်းတွေကို မမြင်နိုင်တော့ပါဘူး။ အဲဒီ့အတွက်ကို ကောင်းခြင်းတွေကို မမြင်နိုင်လေ အဆိုးကိုပိုတွေးမိလေလေနဲ့ အားလျှော့သွားတတ်ကြပြီး အဆိုးနဲ့တင် အရှုံးပေးလိုက်ကြတာပါပဲ။

တကယ်တမ်းက အဆိုးတစ်ခုကြုံလာရင် ကိုယ့်စိတ်ကို တည်ငြိမ်အောင်ထားပြီး အထက်ကပြောသလို ဒီအဆိုးဆိုတဲ့ နံရံရဲ့အခြားတစ်ဘက်မှာ ဘာကောင်းခြင်းရှိမလဲလို့ မျှော်တွေးလိုက်သင့်ပါတယ်။ အဲဒီ့အခါ အစောကတွေးနေတဲ့အဆိုးတွေကို အာရုံစိုက်မှုနည်းပါးသွားပြီး ဒီအဆိုးကိုကျော်နိုင်ရင် “ဒါတွေရလာမှာပါလား၊ ကောင်းလိုက်တာ....ငါ့အတွက် ပိုကောင်းလာနိုင်တယ်” ဆိုတဲ့ ကောင်းခြင်းတွေကို မြင်လာနိုင်ပါတယ်။ လူဆိုတာက ကိုယ့်အတွက် ရနိုင်တဲ့ကောင်းခြင်းကိုမြင်လာတဲ့အခါ စိတ်အားထက်သန်လာကြတယ်မဟုတ်လား။ အဲဒီ့အတွက် အစောတွေးနေတဲ့အဆိုးကို ကျော်လွှားချင်စိတ်ဖြစ်လာတော့တာပါပဲ။ အဲဒါကြောင့် အဆိုးကြုံတဲ့အခါ “ဆိုးလိုက်တာ.....ဆိုးလိုက်တာ....ငါမလုပ်နိုင်ဘူး။ ငါကျော်လွှားနိုင်မှာမဟုတ်ဘူး” ဆိုတဲ့ negative thought တွေကို ကျော်လွန်အောင်ကြည့်ပြီး အဆိုးကိုကျော်နိုင်တဲ့အခါ ရလာမယ့် ရလဒ် ကောင်းကျိုးကို မျှော်ကြည့်လိုက်ပါ။ အဲဒီ့အခါ negative thought အစား positive thought တွေဝင်လာပြီးအဆိုးတွေ၊ အခက်အခဲတွေကို ကျော်လွှားနိုင်မှာပဲ ဆိုတဲ့ စိတ်အားထက်သန်မှုပြန်ရလာနိုင်ပါတယ်။

အတိုဆုံးနဲ့ ခပ်ရှင်းရှင်းပြောရရင် “ဒီအဆိုးမှာ ငါကျရှုံးပြီ” လို့တွေးမယ့်အစား “ဒီအဆိုးကို ငါကျော်လွှားနိုင်မယ်ဆိုရင် ငါ့အတွက် ဘာကောင်းကျိုးရမလဲ” ဆိုတာမျိုးပြောင်းတွေးဖို့ပါပဲ။

မနေ့ကလဲကျနေခဲ့ရင် ကိစ္စမရှိဘူး၊ ဒီနေ ပြန်ထနိုင်အောင် ကြိုးစားဖို့ပဲအရေးကြီးတာပါ။ လောကမှာ လူတိုင်းလဲကျဖူးတယ်ဆိုတာမမေ့ပါနဲ့။ ဒါပေမယ့် ပြန်ထနိုင်အောင် ကြိုးစားသူနဲ့ ပြန်မထဘဲ တကြိမ်တည်းနဲ့ အရှုံးပေးလိုက်သူချင်းသာ ကွာခြားသွားတာပါ။ အဆိုးတွေနဲ့ကြုံချိန်မှာ ဇာတ်မသိမ်းလိုက်ပါနဲ့။ အကောင်းတွေ၊ အောင်မြင်ခြင်းတွေ၊ ပျော်ရှင်ခြင်းတွေ ရရှိလာချိန်ကျမှသာ ဇာတ်သိမ်းလိုက်ပါ။ ဒါမှ ဘဝက ပျော်စရာကောင်းမှာပေါ့ ဟုတ်တယ်မဟုတ်လား။

အထူး စိတ်ဝင်စားဖွယ်၊ သိမှတ်ဖွယ်၊ အကြောင်းအရာ အသစ်တွေထွက်တိုင်း လစဥ် မိမိ အီးမေးလ်ထဲမှာ တန်းဖတ်လို့ ရချင်တယ်၊ ဘဝရဲ့ Facebook စာမျက်နှာနဲ့ Website မှာ တင်ဆက်သွားမယ့် အကြောင်းအရာများအပြင် အခြားသော သီးသန့် ဆောင်းပါးတွေကို ဖတ်ချင်တယ်ဆိုရင် ကိုယ့် မေးလ်လိပ်စာလေးတွေ ချန်ခဲ့ပေးပါ။